Սպասում են Պուտինի արցախյան հաղթարշավին
Ռուսաստանի ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ տեղեկացրել է, որ ՌԴ արտգործնախարար Սերգեյ Լավրովն ապրիլի 24-ին հանդիպելու է ԵԱՀԿ գլխավոր քարտուղար Թոմաս Գրեմինգերի հետ:
Զախարովան հայտնել է, որ հանդիպման ժամանակ ի լրումն այլ հարցերի կքննարկվի Լեռնային Ղարաբաղի հակամարտության կարգավորման հարցը: Կողմերը կանդրադառնան նաև ահաբեկչության դեմ պայքարին, թմրանյութերի սպառնալիքներին և կիբեռանվտանգությանն առնչվող հարցերի:
ԵԱՀԿ գլխավոր քարտուղարը Ռուսաստան կժամանի՝ մասնակցելու Միջազգային անվտանգության հարցերով մոսկովյան 8-րդ համաժողովին:
Այսպես, ապրիլի 15-ին Մոսկվայում կայացել է Հայաստանի և Ադրբեջանի արտգործնախարարների հանդիպումը, որին ներկա են գտնվել նաև ԵԱՀԿ Մինսկի խմբի համանախագահները, Սերգեյ Լավրովը, որը մասնակցում էր սույն հանդիպմանն, այժմ ակտիվ հանդիպումներ է ունենում շահագրգիռ այլ կողմերի հետ:
Միաժամանակ, Ադրբեջանի արտգործնախարար Էլմար Մամեդյարով հայտնել է, որ Միացյալ Նահանգներն առաջարկել է Վաշինգտոնում անցկացնել Ադրբեջանի և Հայաստանի արտաքին գործերի նախարարների հերթական հանդիպումը՝ ղարաբաղյան հակամարտության կարգավորման հարցով: «Ադրբեջանի և Հայաստանի ԱԳՆ ղեկավարների վերջին հանդիպումը կայացել է Մոսկվայում իմ ռուս գործընկեր Սերգեյ Լավրովի նախաձեռնությամբ: Ռուսաստանի հետ համատեղ ջանքերի կրկնակի, եռակի ավելացումով կարելի է հուսալ, որ առաջընթաց կգրանցվի հակամարտության կարգավորման գործում... Երեկ ԱՄՆ-ից հրավեր է ստացվել՝ այցելել Վաշինգտոն, որտեղ պետքարտուղարը ևս ջանքեր կգործադրի հակամարտության լուծման հարցում առաջընթացի հասնելու համար», - ասել է Մամեդյարովը Վարշավայում կայացած ճեպազրույցում:
«Ազատության» խնդրանքով արձագանքելով Ադրբեջանի արտգործնախարարի խոսքերին՝ Հայաստանի արտաքին քաղաքական գերատեսչության մամուլի քարտուղար Աննա Նաղդալյանն այսօր փոխանցեց․ - «Ինչպես գիտեք Լեռնային Ղարաբաղի հիմնախնդրի վերաբերյալ յուրաքանչյուր հանդիպման հաստատումից հետո դրա մասին հայտարարվում է համաձայնեցված կարգով: Իրապես, դիտարկվում է ապագա հանդիպումը համանախագահ երկրներից մեկում անցկացնելու հնարավորությունը՝ հաշվի առնելով նախկին նմանօրինակ հանդիպումների աշխարհագրությունը։ Քանի որ այս հարցը դեռևս քննարկման փուլում է, պետք է ձեռնպահ մնալ միակողմանի ազդարարումներից և հրապարակային բանակցությունների գործելաոճից։ Ավելին, համանախագահ երկրներից մեկում կայանալիք հանդիպման մասին նախապես հայտարարելն անհարգալից վերաբերմունք է գործընթացի մասնակիցների, բայց առաջին հերթին՝ տվյալ համանախագահի նկատմամբ: Դեռևս չկայացած պայմանավորվածությունների ազդարար դառնալու ձգտումը չի նպաստում փոխվստահության հիման վրա նորմալ աշխատանքային մթնոլորտի ձևավորմանը»:
Մոսկվայում կայացած եռակողմ հանդիպումից հետո ամերիկյան կողմի նախաձեռնությունը վկայում է այն մասին, որ նպատակ կա հավասարակշռություն հաստատել միջնորդական առաքելությունում:
Ըստ երևույթին ամերիկյան հրավերի նպատակն այն է, որպեսզի ռուսական նախաձեռնողականությունն այդքան ակնհայտ չդառնա: Բացի այդ, Միացյալ Նահանգներն էլ իր հերթին կձգտի կիսել հնարավոր հաջողության իր մասնաբաժինը:
Բացի այդ գուցե ստեղծվել է մի մթնոլորտ, երբ Վաշինգտոնն ու Փարիզն էլ եկել են ընդհանուր հայտարարի: Այսինքն, բոլոր սպասում են ռուսական կողմի հաղթանակին՝ Հայաստանի և Ադրբեջանի իշխանությունների նկատմամբ ճնշումների գործադրմամբ էական առաջխաղացման արցախյան բանակցային գործընթացում:
Թամար Բագրատունի
Հետևեք մեզ Viber-ում
