Վիրավորական ու անհարգալից վերաբերմունք

Ազգային ժողովը քննարկում է 2007 թվականին Դուշամբեում ստորագրված արտաքին սահմաներում ճգնաժամային իրավիճակների առաջացման և կարգավորման ժամանակ օգնության ցուցաբերման հարցում Անկախ պետությունների համագործակցության մասնակից պետությունների սահմանապահ և այլ գերատեսչությունների փոխգործակցության կազմակերպման կանոնակարգի հաստատման մասին արձանագրության վավերացման հարցը։ Արձանագրությունը ստորագրել են Հայաստանի, Բելառուսի, Ղազախստանի, Ղրղզստանի, Տաջիկստանի հանրապետությունները և ՌԴ-ն: Ազգային անվտանգության ծառայության տնօրենի տեղակալ Արզուման Հարությունյանն ասաց, որ վերջին դեպքերով պայմանավորված նշված արձանագրության վավերացումն իր մեջ հրատապություն է սահմանում: Նախագիծը հարուցեց որոշ պատգամավորների վրդովմունքը։ «Սա վիրավորական ու անհարգալից վերաբերմունք է մեր հանդեպ: Այս պահին, երբ մեր արտաքին սահմանը ռմբակոծվում է, մենք ի՞նչ պատգամ ենք ուղարկում, վավերացնում ենք սա, որ ի՞նչ անենք»,- իր ելույթում ասաց ընդդիմադիր պատգամավոր Ալեքսանդր Արզումանյանը շարունակելով. «Մեր հարգարժան Ղազախստանը, որը վավերացրել է սա, հրաժարվում է նույնիսկ Երևան գալ ու ժողովների մասնակցել: Հիմա մենք ինչի՞ ենք շտապում, էս օրերին մեզ համար սա այդքան անհրաժե՞շտ է: Սպասենք մի քիչ, խաղաղ կարգավորում լինի, տեսնենք մեր բարեկամներն իրենց ոնց են պահում մեր արտաքին սահմանի ռմբակոծության պայմաններում: Երեկ հանրապետության նախագահն ասաց, որ բոլորս շատ մտահոգ ենք, երբ Ռուսաստանը զենք է վաճառում: Այո, մտահոգ ենք, եկեք սրանից էլ մտահոգվենք և ամեն դեմ տրված փաստաթուղթ չվավարեցնենք»,- ասաց Ալեքսանդր Արզումանյանը: Նրա խոսքով, երբ փաստաթուղթը քննարկվում էր ԱԺ արտաքին հարաբերությունների մշտական հանձնաժողովում, ՀՀ ԱԳՆ-ից տեղեկացրել էին, որ դեռևս 2012 թվականին այս արձանագրությունը ուժի մեջ է մտել միայն Բելառուսի, Ղազախստանի, Ղրղզստանի համար: «2016 թիվն է, էս ընթացքում մնացած 11 երկրներից որևէ մեկը վավերացրե՞լ է, թե՞ չի վավերացրել: Արձանագրությունը ստորագրել են երկրներ, որի մեջ կա Ուկրաինան, որի կեսը օկուպացված է»: Ալեքսանդր Արզումանյանը կոչ արեց հանել այս հարցն ԱԺ օրակարգից, մինչև կհասկանանք, թե մեր «բարեկամներն» ինչ մտադրություններ ունեն մեր նկատմամբ, որից հետո պետք է որոշել՝ համագործակցում ենք արդյոք այդ երկրների հետ, թե՞ ոչ: ԱԺ պատգամավոր Ստեփան Մարգարյանը հետաքրքրվեց, թե ավելի կոնկրետ ի՞նչ է ենթադրում արձանագրությունը Հարությունյանն ասաց, որ մինչ այժմ Հայաստանը չի դիմել կոորդինացիոն խորհրդի ճգնաժամային իրավիճակում փոխօգնություն ցուցաբերելու համար: Այս համագործակցության սահմաններում, ըստ ԱԱԾ փոխտնօրենի, օրինակ, Հայաստանը ֆինանսական օգնություն է ցուցաբերել Տաջիկստանին: «Պարտավորությունների մեջ մտնում է ինչպես մարդկային ուժով աջակցությունը, այնպես էլ ֆինանսապես», -հստակեցրեց Հարությունյանը: Նիստը վարող Էդուարդ Շարմազանովն ասաց, որ հարցն ընդամենը քննարկվում է, ԱԺ քառօրյան այսօր ավարտվում է և քվեարկության մասին կարելի է հետո խոսել։ Մինչդեռ դա չի արդարացնում մեր իշխանավորների վերաբերմունքը առ այս համաձայնագիր, կամ այն մեզ պարտադրողները։ Մեկ օր առաջ Ղազախստանի պահանջով չեղյալ արվեց Երեւանում տեղի ունենալիք ԵՏՄ նիստը: Դա բացատրվեց նրանով, որ ԵՏՄ անդամները չեն ցանկացել նեղացնել Ադրբեջանին, որի հետ առավել քան ջերմ հարաբերություններ ունեն: Ի՞նչ երաշխիք, որ նման համաձայնագրի պարագայում այս երկրները իրենց մեր սահմաններին ճգնաժամային իրավիճակներում նույն կերպ չեն պահի, քան այժմ է։ Անի Սահակյան