Կինոյի տղան.Դավիթ Սանասարյանը դեռ չի խրատվել

Պետական վերահսկողական ծառայության պետ Դավիթ Սանասարյանի եւ իր ղեկավարած կառույցի շուրջ վերջին ամիսների սկանդալից հետո թվում էր, թե Սանասարյանն իրեն պետք է մի քիչ զուսպ պահեր, ամենակարեւորը՝ հեռու գյուղապետերից, բայց դա միայն թվում էր: Քանի որ սա նոր Հայաստանն է, իսկ այստեղ պետական պաշտոնյաներն իրենց կարող են թույլ տալ ամեն ինչ, անգամ ամենաանհավանականը:

Մի քանի օր է Արմավիրի մարզի Զարթոնք համայնքի անհանգիստ մթնոլորտը տարածվել է լրատվամիջոցներում, ու պարզ է դառնում, որ գյուղում մարդկանց մի խումբ պահանջում է ավելի քան քսան տարվա գյուղապետի հրաժարականը: Կարելի էր կարծել, որ սովորական հետհեղափոխական իրավիճակ է եւ իշխանություննները յուրայինների միջոցով հերթական գյուղապետից էին ուզում ազատվել՝ այդ պաշտոնը տալով յուրայինին:

Բայց այս մեկը դուրս եկավ սովորական օպերացիայի սահմաններից՝ փողոց փակելուց բացի, փակեցին նաեւ երկաթգիծը, բայց սա էլ ամենը չէր, ի վերջո գյուղում հնչեցին կրակոցներ: Կրակողը գյուղապետի թոռն էր, պարզաբանեցին, որ խմբով գնացել էին գյուղապետի տան վրա եւ այդ օդ կրակոցները բնական ինքնապաշտպանություն էր: Եւ ահա, այսպիսի իրավիճակում, երբ գյուղապետը հայտարարում է, որ ինքը չի պատրաստվում հրաժարական տալ, քանի որ ինքը չարաշահումներ թույլ չի տվել ու հիսուն հոգու ցանկությունը չի կատարելու:

Եւ, ահա, այս պահին հայտնվեց կինոյի տղեն՝ նույն ինքը Դավիթ Սանասարյանը ու գնաց գյուղ: Չանցավ մի քանի ժամ եւ հայտարարվեց, որ գյուղապետը հրաժարական է տվել: Պարց է չէ՞, թե ինչն է դարձել գյուղապետի հրաժարականի պատճառը, մի պաշտոն, որն առաջնային մանդատ ունի, ուղիղ ընտրությամբ են հայտնվում այդ պաշտոնում, բայց արի ու տես մի պաշտոնյա, որի ղեկավարած կառույցում լրջագույն ստուգումների առիթ կա, հանկարծ գնում հասնում է գյուղ՝ իբր ստուգումների եւ դրան հաջորդում է հրաժարականը:

Ի վերջո, միթե Դավիթ Սանասարյանի ստուգումնեին լուրջ մարդիկ դեռ պետք է հավատան, երբ նրա ենթակաները կարող են բիզնես խլել, նրանցից մեկն էլ դեռ կալանավայրում է, այս ամենը նմանվում է տրագիկոմեդիայի: Ավելորդ է հիշեցնել Ուրցաձորի դեպքերը, երբ Դավիթ Սանասարյանի մի քանի շուրջօրյա շանտաժը նույնպես ավարտվեց հրաժարականով, իսկ այն , ինչ եղավ հետո, շատ հուզիչ էր…Ստիպողաբար պաշտոնանկ արված գյուղապետը ձայների բացարձակ առավելությամբ նորից դարձավ գյուղապետ՝ իսկ Սանասարյանի հայտնաբերած ստուգումները մնացին սառույցին:

Այնպես որ, պարոնայք, ձեզ մի ներշնչեք, որ հույժ կարեւոր կառույց եք ղեկավարում ու ձեզանից պետք է սարսափեն, ձեր միակ գործիքը շանտաժն է, որը ոչ բոլորի դեմ է ազդում:

Անի Սահակյան