Ինչ են պայմանավորվել Սերժ Սարգսյանն ու Նիկոլ Փաշինյանը

Երբ Նիկոլ Փաշինյանը դեռ պատգամավոր էր, բազմաթիվ անգամ ասել էր, որ 2008 թվականի մարտի 1–ի գլխավոր պատասխանատուն Սերժ Սարգսյանն է, քանի որ Ռոբերտ Քոչարյանը հենց նրա համար է թափել խաղաղ բնակիչների արյունը։ Նիկոլ Փաշինյանն արդեն մոտ մեկ տարի է վարչապետ է, Մարտի 1-ի գործն էլ իր ասելով բացահայտված է, սակայն Սերժ Սարգսյանը ոչ միայն ազատության մեջ է, այլեւ ակտիվ մասնակցություն է ցուցաբերում տարբեր միջոցառումներին: Ավելին, Սերժ Սարգսյանի թիմակիցները վերջին շրջանում ակտիվորեն գովազդում են, որ շուտով Սերժ Սարգսյանը հարցազրույց կտա ու պաշտոնանկությունից մեկ տարի հետո կտա շատ հարցերի պատասխաններ:

Ու մինչ մի մասը հպարտության սպասումներով է խոսում Սերժ Սարգսյանի առաջիկա
հայտնությանը՝ հրապարակային հարթակում, թիմից նաեւ արտահոսեր են կազմակերպվում, թե Սերժ Սարգսյանն ու իր ընտանիքը թավշյա հեղափոխությունից հետո ճնշումների են ենթարկվում: Մասնավորապես , մի քանի օր առաջ այդ մասին իր հարցազրույցում հայտարարեց Կարինե Աճեմյանը: Հասկանալի է, որ իրավիճակին հակասող նման հայտարարությունները հենց այնպես, պատահական չեն արվում: Ըստ ամենայնի Սերժ Սարգսյանի թիմում էլ են հասկացել, որ վերջինիս կարգավիճակը, ավելի ճիշտ արտոնյալ վիճակը կասկածներ ու մի շարք հարցեր են առաջացնում ու նման հայտարարություններով կարելի է շղարշել իրականությունը: Բայց Հայաստանը փոքր է եւ բոլորն ամեն ինչի մասին գիտեն այնքան լավ, քան պատկերացնում են Հանրապետականները:

Իրողությունն այն է, որ իշխանափոխությունից հետո սպասելի էր, որ նա Ռոբերտ Քոչարյանից առաջ պետք է հայտնվեր սույն գործով մեղադրյալի աթոռին, ի վերջո, Նիկոլ Փաշինյանի ընդդիմադիր պնդումներն էին նման կանխատեսումների հիմք տալիս: Սակայն Նիկոլ Փաշինյանի թավշյա հեղափոխությունից եւ Սերժին մերժելուց հետո ամենաշատը թերեւս տուժեց Քոչարյանը: Նիկոլ Փաշինյանը մի քանի անգամ ստիպված է եղել պատասխանել այդ հարցադրումներին, սակայն էլ ավելի է իրավիճակը զավեշտալի դարձրել: Օրինակ մի առիթով նա հայտարարեց «Ասում են՝ բա ինչի՞ Սերժ Սարգսյանին չեք բռնում, հիմա որ ասեմ` մյուս շաբաթ կբռնեն, կասեն՝ ահա, քննության նկատմամբ ճնշումները սկսվեցին, չի փոխվի էս երկրում ոչ մի բան։ Չբռնեցին, կասեն, հա՜, պայմանավորված է, չի փոխվել ոչ մի բան»:

Հետո մի քանի առիթով էլ Փաշինյանը առաջ անցնելով բացառել է պայմանավորվածությունը, հեգնելով, թե թավշյա հեղափոխությունն էլ էին կապում Սերժ Սարգսյանի եւ իր մերձավորների հետ պայմանավորվածության: Սակայն հայտարարելը մի բան է, իրականությունը այլ, եւ կյանքը ցույց է տալիս, որ Նիկոլ Փաշինյանի հայտարարությունները որպես կանոն չեն համապատասխանում այդ իրականությանը:

Անի Սահակյան