Թուրքիայում ԱՄՆ դեսպանի թեկնածուն հրաժարվում է արտասանել ցեղասպանություն տերմինը. ԱՄՆ սենատորը հարց է ուղղել

Ամերիկացի սենատոր Ռոբերտ Մենենդեսն երկրի Սենատի միջազգային հարցերով զբաղվող հանձնաժողովում Թուրքիայում ԱՄՆ դեսպանի թեկնածու Դևիդ Մայքլ Սաթերֆիլդի հետ հարցուպատասխանի ժամանակ անդրադարձել է Հայոց ցեղասպանության ճանաչման հարցին: Այս մասին տեղեկանում ենք ԱՄՆ Սենատի պաշտոնական կայքէջից:
Հրապարակված տեսանյութում Մենենդեսն հայտարարել է, որ հիասթափված է Սաթերֆիլդի՝ իր հետ հանդիպումը չեղարկելու որոշումից: Հենց այս պատճառով էլ նա որոշել է առիթը բաց չթողնել ու իրեն հուզող հարցերի պատասխանները ստանալ նիստի ընթացքում:

«Թույլ տվեք ինձ սկսել հարցից, թե արդյոք Դուք ընդունո՞ւմ եք, որ 1915-1922թթ. ընթացքում Օսմանյան կայսրության կողմից սպանվել է մոտ 1,5 միլիոն հայ տղամարդ, կին և երեխա»,- հարցրել է Մենենդեսը:

«Մենք միանշանակ տեղյակ ենք այդ դաժանության փաստի մասին»,- ի ատասխան նշել է թեկնածուն:

«Ես ճի՞շտ եմ հասկանում, որ Դուք դա ընդունում եք»,- հստակեցնելու միտումով պնդել է Մենենդեսը, ինչին Սաթերֆիլդը դրական պատասխան է տվել:

«Այսինքն Դուք ընդունո՞ւմ եք, որ կատարվածը ցեղասպանություն էր»,- եզրակացրել է Մենենդեսը:

«Պարո՛ն սենատոր, նախագահը հայտարարել է, որ դա 20-րդ դարի ամենասարսափելի դաժանություններից էր, և ես համակարծիք եմ այդ հայտարարության հետ»,- մանրամասնել է Սաթերֆիլդը:

«Անկասկած, դա դաժանություն էր, սակայն հարցն այն է՝ արդյո՞ք այն ցեղասպանություն էր»,-կրկին հարց է ուղղել սենատորը:

«Վերոհիշյալ հայտարարությունն արտահայտում է ԱՄՆ կառավարության դիրքորոշումը»,-նշել է թեկնածուն:

«Լավ, չեք նշում, որ դա ցեղասպանություն էր: Թույլ տվեք հարցնել՝ Դուք ընդունո՞ւմ եք, որ 1915թ. Անգլիայի, Ֆրանսիայի և Ռուսաստանի դաշնակից ուժերն առաջին անգամ միասնաբար մեղադրեցին այլ կառավարությանը մարդկության և քաղաքակրթության դեմ հանցանք գործելու համար»,-հետաքրքրվել է Մենենդեսը: Ի պատասխան այս հարցադրմանը Սաթերֆիդլը հավելել է, որ ինքը պատմաբան է ու տեղյակ է այն ժամանակ տեղի ունեցած իրադարձությունների մասին:

Նիստի ընթացքում սենատորը նաև անդրադարձել է Հայոց ցեղասպանության ժամանակ Օսմանյան կայսրությունում ԱՄՆ դեսպան Հենրի Մորգենթաուի այն հայտարարությանը, ըստ որի` հայերին տեղահան անելու վերաբերյալ թուրքական իշխանությունների հրահանգը մահվան դատավճիռ էր մի ողջ ազգի համար`միևնույն ժամանակ իշխանությունները Մորգենթաուի հետ զրույցում չեն փորձել թաքցնել այդ իրողությունը:

«Ես տեղյակ եմ այդ հայտարարության մասին»,- ասել է Սաթերֆիլդը՝ կոնկրետ չպատասխանելով՝ արդյոք ընդունում է այդ հայտարարությունը, թե ոչ:

«Դե ինչ, այս ամենը նման է խորամանկ պարի, որը մենք պարում ենք որպես ազգ՝ չճանաչելով Հայոց ցեղասպանության պատմական փաստը: Նույնիսկ միջկառավարական հաստատություն հանդիսացող Հոլոքոստի ամերիկյան թանգարանը ճանաչել է Հայոց ցեղասպանությունը, մինչդեռ մենք չենք կարողանում ընդունել դա: Սակայն եթե մենք չճանաչենք անցյալը որպես իրողություն, չենք կարողանա առաջ շարժվել»,-եզրափակել է Մենենդեսը:

Հավելենք նաև, որ նիստի ընթացքում հարցուպատասխան է եղել նաև Հյուսիսային Մակեդոնիայում, Իռլանդիայում և Թուրքիայում ԱՄՆ դեսպանների թեկնածուների հետ:

yerkir.am