Հնգամյա դիմակայության ու նյարդերի պայքար. Պուտինը դիմանում է, իսկ Ռուսաստա՞նը
ԱՄՆ-ը հայտարարեց, որ այսուհետ ևս պատժամիջոցներ կկիրառի Ռուսաստանի հանդեպ: Իսկ ավելի ճիշտ՝ ԱՄՆ ֆինանսների նախարարությունը համարում է, որ Ռուսաստանի հանդեպ պատժամիջոցների քաղաքականությունը հաջողված է, և Վաշինգտոնը կշարունակի նոր պատժամիջոցներ կիրառել Մոսկվայի դեմ։ Այս մասին հայտարարեց ԱՄՆ ֆինանսների նախարար Սթիվեն Մնուչինը՝ Կոնգրեսի Ներկայացուցիչների պալատի հատկացումների հանձնաժողովի ենթահանձնաժողովներից մեկում լսումների ժամանակ։
«Պատժամիջոցները շատ կարևոր գործիք են։ Ես կարծում եմ, որ մենք դրանք շատ արդյունավետ ենք օգտագործել Ռուսաստանի դեմ, մենք կշարունակենք օգտագործել դրանք Ռուսաստանի դեմ՝ կապված նրա ոչ պատշաճ վարքագծի հետ, որպեսզի փոխենք նրա վարքագիծը»,- ասել է նա՝ պատասխանելով հանրապետական կոնգրեսական Քրիստոֆեր Ստյուարտի հարցին։ Օրենսդիրը նաև հայտարարել է, որ «Պատժամիջոցներով Ամերիկայի հակառակորդներին դիմակայելու մասին» ամերիկյան օրենքով նախատեսվում է ռուսական մետալուրգիական և հանքարդյունաբերական ոլորտի ձեռնարկությունների հանդեպ պատժամիջոցների կիրառում, սակայն նման սահմանափակումներ Վաշինգտոնի կողմից դեռ չեն մտցվել։
Այսպես, ԱՄՆ-ը հակառուսական պատժամիջոցներ սկսեց կիրառել 2014-ից՝ դրանք հիմնավորելով Ուկրաինայի հարավ-արևելքում հակամարտությամբ և ՌԴ-ի կողմից Ղրիմի անեքսիան։ Գրեթե հնգամյա դիմակայություն, նյարդեր ու լարում...
Իր հերթին երեկ Վլադիմիր Պուտինը խոսել է Թրամփի հետ տարաձայնությունների մասին: Ելույթ ունենալով Սանկտ Պետերբուրգում համաժողովում, նա նշել է, որ Ռուսաստանը բազմաթիվ տարաձայնություններ ունի ԱՄՆ նախագահ Դոնալդ Թրամփի հետ: Նրա խոսքով՝ Թրամփի իշխանավարման ընթացքում բազմաթիվ հակառուսական պատժամիջոցներ են կիրառվել, որոնց հետ ՌԴ-ն համաձայն չէ և երբեք չի համաձայնվի: «Սակայն եթե վերականգնվի ԱՄՆ-ի և Ռուսաստանի միջև երկխոսությունը՝ լիարժեք, իրավահավասար, այդ թվում, այն հարցերի շուրջ, որոնք բխում են նաև մեր ու ողջ մարդկության շահերից՝ մենք միայն ուրախ կլինենք, մենք պատրաստ ենք դրան», նշել է Պուտինը:
Ավելին՝ Պուտինը հստակեցրել է, որ Ռուսաստանի և Միացյալ Նահանգների միջև առկա են նաև՝ «համագործակցության տարրեր»: Պուտինը մատնանշել է Սիրիայի հարցում համատեղ աշխատանքը՝ չնայած այն հանգամանքին, որ դրա կարգավորման վերաբերյալ երկու երկրների տարբեր մոտեցումներ ունեն:
Այսպիսով, Պուտինը ամերիկյան պատժամիջոցների «հնգամյակին», կրկին բարձրաձայնում է ԱՄՆ-ի հետ երկխոսության Ռուսաստանի պատրաստակամության մասին՝ իրավահավասարության սկզբունքով:
Հնգամյա լարումն իհարկե, թուլացրել է Ռուսաստանը՝ սոցիալ-տնտեսական առումով, բայց աշխարհաքաղաքական տեսանկյունից Պուտինի «ազատություններն» այդպես էլ հնարավոր չի դարձել նվազեցնել: Նա պահպանում է այն ազդեցությունը, որն ունեցել է երկկողմ հարաբերություններում այլ երկրների առաջնորդների հետ:
Մետաքսյա Շալունց
Հետևեք մեզ Viber-ում
