Նիկոլ Փաշինյանի հայրը՝ իր ազգականի չարաշահման մասին.Araratnews.am

Երեկ ՀՀ վարչապետ Նիկոլ Փաշինյանը «Ֆեյսբուք»-ում գրել էր, որ իր անմիջական ցուցումով քրեական գործ է հարուցվել իր մի մերձավոր ազգականի թույլ տված ենթադրյալ չարաշահման փաստի առիթով:

 Քանի որ իրավապահները լռում են, Araratnews.am-ը զանգահարեց Նիկոլ Փաշինյանի հորը՝ Վովա Փաշինյանին՝ տեղեկանալու, թե արդյոք հավաստի են այն լուրերը, որ քրեական գործը հարուցվել է Փաշինյանի մորաքրոջ տղայի դեմ, որը անտառագողությամբ է զբաղվել: «Ես տեղեկություն չունեմ: Նոր թերթում կարդացի: Բայց ասեմ, որ իմ մորքուրի տղաներից որեւէ մեկը նման գործողություն չի կատարել»,- ասաց վարչապետի հայրը:

Վովա Փաշինյանն ասաց, որ որդու չի խոսել տեղի ունեցածի մասին, քանի որ նա շատ զբաղված է, չի ուզում անհանգստացնել նրան: «Ես տեղյակ չեմ՝ ում մասին է խոսքը», հավաստիացրեց հայրը, ապա շարունակեց՝ Փաշինյանի մորաքրոջ տղաների հետ այս դեպքը կապ չունի:

Հարցին՝ Վովա Փաշինյանը չգիտի՞, թե իր բարեկամներն ինչով են զբաղվում: Ի վերջո հատկապես գյուղերում, մարզերում բոլորը իրար լավ են ճանաչում: Ի պատասխան Վովա Փաշինյանն ասաց. «Նայած ինչ բարեկամ: Էս վերջերս այնքան բարեկամ է դուրս եկել, որ կյանքում չենք էլ լսել»:

Տեղեկություններ կան, որ Նիկոլ Փաշինյանի մորաքրոջ որդին տարիներ առաջ աշխատել է «Հայկական ժամանակ» թերթում, սակայն 2008 թ-ի Մարտի մեկի դեպքերից հետո, երբ Փաշինյանն ընդհատակում էր, մորաքրոջ տղան Փաշինյանի դեմ ցուցմունք է տվել: «Դատավարության պրոցեսներին միշտ մասնակցել եմ, բայց նման առաջին անգամ եմ լսում»,- ասաց վարչապետի հայրը: