Կրեմլը սպասում է «շոուի» շարունակության՝ Արցախյան հարցում

Հայաստանի և Ադրբեջանի արտգործնախարարները մոտ ապագայում կհանդիպեն, «Ազատությանը» հայտնեց Հայաստանի արտգործնախարարության մամուլի խոսնակ Աննա Նաղդալյանը: «ԵԱՀԿ Մինսկի խմբի համանախագահների կողմից առաջիկայում հանդիպում անցկացնելու առաջարկ եղել է»,- հայտնեց Նաղդալյանը՝ չհստակեցնելով հանդիպման օրն ու վայրը․- «Ամսաթիվը մենք միշտ հայտնում ենք համաձայնեցված կարգով, և չենք խախտելու այդ սկզբունքը»:

Ղարաբաղյան կարգավորմամբ զբաղվող համանախագահները մարտի 29-ին Վիեննայում Նիկոլ Փաշինյան-Իլհամ Ալիև հանդիպումից հետո հայտարարել էին, որ Հայաստանի ու Ադրբեջանի ղեկավարները հանձնարարել են իրենց նախարարներին մոտ ապագայում հանդիպել համանախագահների հետ:

Այսօր ԱՊՀ պետությունների արտգործնախարարներն են Մոսկվայում հավաքվում, հավաքին մասնակցելու է նաեւ Ադրբեջանի արտգործնախարար Էլմար Մամեդյարովը, սակայն Հայաստանի արտգործնախարարը բաց թողեց նրա հետ հանդիպելու առիթը: Հիմա, փաստորեն, միջնորդներն աշխատում են նրանց հանդիպումները կազմակերպելու այլ ժամկետների հետ կապված:

Մոսկվան, ըստ ամենայնի, չի հրաժարվի Հայաստանին ու Ադրբեջանին մերձեցնելու ղեկն իր վրա վերցնել: Ռուսաստանը պատրաստ է աջակցություն տրամադրել Երևանին և Բաքվին՝ Վիեննայում ձեռք բերված պայմանավորվածությունների իրականացման համար, հայտարարել է Ռուսաստանի արտգործնախարարության խոսնակ Մարիա Զախարովան:
«Բանակցային գործընթացը շարունակվում է, կողմերը ի ցույց են դնում խաղաղ կարգավորման հասնելու պատրաստակամություն», - ադրբեջանական ONA գործակալությանը տված հարցազրույցում ասել է Զախարովան՝ հավելելով, որ այդ մտադրությունը առկա է եղել նաև Հայաստանի վարչապետի և Ադրբեջանի նախագահի միջև անցած շաբաթ Վիեննայում կայացած հանդիպմանը: «Մենք ողջունում ենք կառուցողական մոտեցումը, որը գերակշռող է եղել բանակցություններում, և այսուհետ էլ կողմերին կցուցաբերենք անհրաժեշտ աջակցություն, որպեսզի իրականություն դառնան այն գաղափարները, որոնց շուրջ փոխըմբռնում է եղել Ավստրիայի մայրաքաղաքում», - ասել է Ռուսաստանի արտգործնախարարության խոսնակը:

Միաժամանակ Հայաստանին ու Ադրբեջանին շարունակում են կոչ են աշխատել ու արդյունք ցույց տալ:

ԵԱՀԿ գործող նախագահը կոչ է անում Հայաստանին ու Ադրբեջանին օգտագործել ղարաբաղյան կարգավորման ընթացքում ի հայտ եկած նպաստավոր պահը: «Բանակցություններում նոր թափ կա, հույսեր: Հիմա մեզ անհրաժեշտ է այդ հնարավորությունը վերածել հստակ քայլերի», - ադրբեջանական «Թուրան» գործակալությանն ասել է Միրոսլավ Լայչակը: Ավելի վաղ, ելույթ ունենալով ԱՄՆ Կոնգրեսի Հելսինկյան հանձնաժողովում, ԵԱՀԿ գործող նախագահը նշել է՝ «թեև որոշ դրական զարգացումներ են արձանագրվել, մենք դեռ շատ բան պետք է տեսնենք, որպեսզի կարողանանք խոսել իրական առաջընթացի մասին»:

Թամար Բագրատունի