ԱԱԾ-ն լրագրող Նիկոլ Փաշինյանին՝ դու էլ փախիր․․․

Կառավարության նիստում վարչապետի՝ Ֆեյքերի դեմն առնելու վերաբերյալ Ազգային անվտանգության ծառայության տնօրենին տված հանձնարարականը լսելուց հետո, երբ փորձեցի պատկերացնել դրա իրականացումը, հայտնի անեկդոտը մտաբերեցի։

«Նապաստակը գլխապատառ վազում է անտառով և դեմ առ դեմ հանդիպում արջին․
-Էս ո՞ւր շլդիկ, ինչո՞ւ ես էսքան խառը, ի՞նչ է պատահել։
-Ա՛րջ ախպեր, տեղյակ չե՞ս՝ ինչ է եղել։ ԱԱԾ-ն մտել է անտառ, ինչքան կոռուպցիոներ ու կաշառակեր կա, բոլորին բռնում ամորձատում են:
- Ա՛յ շլդիկ ջան, դու ե՞րբ ես կաշառք վերցրել կամ կոռուպցիայով զբաղվել, որ հիմա էլ էդպես փախչում ես:
-Ա՛րջ ախպեր, դու էլ փախիր, որովհետև նախ ամորձատում են, հետո են որոշում, ով է կաշառակեր ու կոռուպցիոներ, ով՝ ոչ» ։
Իսկապես անհնար է հասկանալ, թե ԱԱԾ-ն ի՞նչ մեթոդաբանությամբ է առաջնորդվելու, որ կարողանա հստակ տարանջատել ֆեյքին իրական օգտատիրոջից, կարծիքի ու խոսքի ազատությունը մանիպուլիացիայից։ ԱԱԾ պետ Արթուր Վանեցյանը հայտարարեց, թե իրենք առաջին հերթին զբաղվելու են այն գրառումներով, որոնք իրենց մեջ հանցակազմ են պարունակում։ Բոլոր ժամանակներում էլ հանցակազմ պարունակող հրապարակային հայտարարությունները իրավապահների կողմից դիտարկելու են։ Բայց պետք է համաձայնել, որ երբ վարչապետը Ազգային ավտանգության ծառայությանը հանձնարարում է՝ զբաղվել տեղեկատվական մանիպուլիացիաներով, գրաքննության տպավորություն է թողնում։ Եթե անգամ վարչապետ Նիկոլ Փաշինյանը որևէ նպատակ չունի վնասել խոսքի ազատությունը և բազմակարծությունը, որոնք ժողովրդավարության գրավականն են ու վերջին տարիներին մեր երկրի հիմնական ձեռքբերումներից, միևնույնն է, ԱԱԾ-ն չի կարող լինել խոսքի ազատության երաշխավոր։

ԱԱԾ-ն ու խոսքի ազատությունը տրամագծորեն միմյանց հակասող երևույթներ են։ Եթե երկրի ղեկավարը Ազգային անվտանգության ծառայությանը հանձնարարում է վերահսկել մարդկանց արտահայտած կարծիքները, սա դառնում է սպառնալիք։ Հենց միայն այն գիտակցումից, որ մի կարծիքի պատճառով մարդիկ կարող են հայտնվել ԱԱԾ թիրախում, շատերն ուղղակի վախենալու են կարծիք արտահայտել։ Վարչապետի հանձնարարականը պետական ռեպրեսիվ մահակ է, որը կարող է օգտագործվել անցանկալի անձաց լռեցնելու, անձնական հաշվեհարդարներ տեսնելու համար։ Տեղի ունեցածը շատ դժվար իրավիճակ է ստեղծում նաև ԶԼՄ-ների համար, որովհետև ԶԼՄ-ները ևս երբեմն հրապարակում են տեղեկություններ, որոնց իրավացիությունն այդ պահին չեն կարող ապացուցել։
Պարտավոր ենք խոստովանել, որ խոսքի ազատությունը Հայաստանում, որպես բացարձակ արժեք, նախկին իշխանության օրոք առաջընթաց է ապրել, չնայած որ այն խնդիրները, որոնք վարչապետ Նիկոլ Փաշինյանն այսօր դիտարկում է ազգային անվտանգության սպառնալիք, կային նաև նախկինում։ Հետաքրքիր է՝
ինչպե՞ս կարձագանքեր վարչապետ Նիկոլ Փաշինյանի՝ ԱԱԾ-ին տված հանձնարարականին լրագրող, խմբագիր և պատգամավոր Նիկոլ Փաշինյանը։

Հայկ Դավթյան