Դավիթ Անանյանը մոլորեցնում է և՛ հասարակությանը, և՛ կառավարությանը, և՛ վարչապետին

Պետական եկամուտների կոմիտեի նախագահ Դավիթ Անանյանը հայտարարել է, որ հարկային հավաքագրումների համար եռամսյակային պլան չկա, կան եռամսյակային համամասնություններ:
«Կառավարության որոշմամբ՝ 2019 թվականի պետական բյուջեի եկամուտների համար սահմանվել է 1 տրիլիոն, 401 մլրդ, 875 մլն դրամ հարկային եկամուտներ և պետական տուրքեր, որոնք, ըստ էության, հաշվարկվում են մակրոտնտեսական ցուցանիշների հիման վրա, հետևաբար այդ գումարը ՀՆԱ-հարկեր հարաբերակցության արդյունքում ստացված թիվ է։ Այնուհետև այդ թիվը, Կառավարության որոշմամբ, բաժանվել է եռամսյակների, և առաջին եռամսյակի ծրագրային համամասնությունը սահմանված է 285, 1 մլրդ, սակայն փաստացի հավաքագրումը կազմել է 296,5 մլրդ, այսինքն՝ սահմանված չափանիշը գերակատարվել է 11,4 մլրդ դրամով կամ 4 տոկոսով»,- ՊԵԿ հավաքագրումների ցուցանիշները ներկայացնելիս հայտարարել է Դավիթ Անանյանը։ Նրա խոսքով՝ նախորդ տարվա նույն ժամանակահատվածի համեմատ պետական եկամուտների հավաքագրումն ավելացել է 55,5 մլրդ դրամով։

Դավիթ Անանյանի դիտարկմամբ՝ պետական եկամուտների կոմիտեն 2019 պետական բյուջեի հարկային եկամուտները կատարելու և գերակատարելու է հիմնականում հարկային ստվերի կրճատման և ոչ թե տնտեսական աճի հաշվին: Անանյանը խոստովանել է․ «Տնտեսական աճ չունենք, այո՛, չունենք։ Տնտեսական աճն այդքան չի, որ ապահովեր այս բացառիկ աճը: Սա համատեղ աշխատանքի արդյունք է՝ ստվերի կրճատման ուղղությամբ: 55 մլրդը հիմնականում ստվերի հաշվին է կատարված, քան տնտեսական աճի։ Եթե տնտեսական աճը մեզ օգնի, մենք շատ կուրախանանք, բայց հաջորդ տարիներին մենք ակնկալում ենք, որ տնտեսական աճը պետք է լինի դոմինանտը, ոչ թե ստվերի բացահայտումը: Մենք անընդհատ ստվերը կրճատելու ուղղությամբ քայլեր ենք անելու, բայց կարծում եմ, որ մենք բոլորս ամեն ինչով պետք է նպաստենք, որ տնտեսությունը զարգանա»,- ասաց նա՝ հավելելով, որ հաջորդ տնտեսական աճով պետք է պայմանավորված լինի բյուջետային ցուցանիշների ապահովումը:

Բայց արի ու տես, որ ստվերի կրճատում ևս, եթե հավատանք նույն Դավիթ Անանյանի ներկայացրած թվերին, առանձնապես չունենք։ Ընդունված կարծիք կա, որ ստվերի կրճատման հիմնական ցուցանիշը դիտարիվում է հարկեր-ՀՆԱ հարաբերակցության ցուցանիշի հիման վրա։ Այսպես, ըստ Դավիթ Անանյանի ներկայացրած տվյալների, 2019 թվականի առաջին եռամսյակում հարկեր-ՀՆԱ հարաբերակցությունը, համաձայն 2019 թվականի պետական բյուջեի մաիսն ՀՀ օրենքի, պետք է կազմեր է 20,9 տոկոս, մինչդեռ այդ նույն ցուցանիշը 2018 թվականին պլանավորված էր 21,9 տոկոս և փաստացի ապահովվել է մոտ 22 տոկոս։ Համեմատության համար նշենք, որ 2017 թվականին հարկեր-ՀՆԱ հարաբերակցության ցուցանիշը փաստացի կազմել է 22,4 տոկոս։ Հիմա, ստացվում է, որ մենք գործ ունենք հարկեր-ՀՆԱ հարաբերակցության ընդամենը 21 տոկոս ցուցանիշի հետ, որը նախորդ տարվա համեմատությամբ ավելի ցածր ցուցանիշ է։ Եթե իրականում տեղի է ունեցել ստվերի կրճատում, ինչպես հավատացնում է ՊԵԿ նախագահը, ապա այդ ցուցանիշը նախորդ տարվա համեմատ առնվազն պետք է աճած լիներ։ Քանի դեռ նման բան տեղի չի ունեցել, պետք է արձանագրել, որ Դավիթ Անանյանը մոլորեցնում է և՛ հասարակությանը, և՛ կառավարությանը, և՛ վարչապետին։

Հայկ Դավթյան