Ալիևը սպառնաց պատերազմով ու զանգեց Պուտինին

Հայաստանի հետ պատերազմը չի ավարտվել, ապրիլի 2-ին հայտարարել է Ադրբեջանի նախագահ Իլհամ Ալիևը՝ երկրի ՊՆ հատուկ նշանակության զորամաս այցելության ժամանակ:

Վիեննայում ԼՂ հակամարտության կարգավորման հարցով հանդիպումը ևս մեկ անգամ հաստատել է բանակցությունների ձևաչափը` դրանք Հայաստանի ու Ադրբեջանի միջև են, ասել է Ալիևը:

Նա նշել է, որ Ադրբեջանին հաջողվել է կանխել Հայաստանի ղեկավարության` բանակցային ձևաչափը փոխելու փորձը: «Ադրբեջանի միանշանակ դիրքորոշումը կանխել է դա»,- շեշտել է Ալիևը: Նա կրկին հիշեցրել է պաշտոնական Բաքվի տեսակետը, որ՝ «Ադրբեջանի տարածքները օկուպացրել է Հայաստանը», այդ իսկ պատճառով բանակցությունները պետք է տարվեն Հայաստանի հետ: «Օկուպացված տարածքներում ծառայողների 80 տոկոսը ՀՀ քաղաքացիներ են: Այդ իսկ պատճառով բանակցությունները վարվում են և պետք է վարվեն Հայաստանի ու Ադրբեջանի միջև»,- ասել է Ալիևը:
Ալիևը հիշեցրել է, որ Բաքվի դիրքորոշումը չի փոխվել` Ադրբեջանի տարածքային ամբողջականությունը պետք է վերականգնվի: Ապա, Ալիևը անցել է ավանդական դարձած սպառնալիքին՝ խոսելով Հայաստանի հետ պատերազմի մասին: Նա ասել է, որ պատերազմը դեռ ավարտված չէ/ «Մենք ապրում ենք պատերազմի պայմաններում: Պատերազմը դեռ չի ավարտվել: Ավարտվել է դրա առաջին փուլը»:

Հետաքրքրականն այն է, որ այս բոցաշունչ, Հայաստանի ուղղությամբ սպառնալիքներով համեմված ելույթից հետո Ալիևը զանգահարել է Պուտինին...

Ռուսաստանի նախագահ Վլադիմիր Պուտինը հեռախոսազրույց է ունեցել Ադրբեջանի նախագահ Իլհամ Ալիևի հետ, ասվում էր Կրեմլի տարածած հաղորդագրության մեջ: Իլհամ Ալիևը կիսվել է Վիեննայում մարտի 29-ին Հայաստանի վարչապետ Նիկոլ Փաշինյանի հետ տեղի ունեցած հանդիպման գնահատականներով:

«Վլադիմիր Պուտինն ընդգծել է Բաքվի և Երևանի միջև բանակցային գործընթացի ակտիվացման կարևորությունը: Նա պատրաստակամություն է հայտնել հետագայում էլ աջակցություն ցուցաբերել Լեռնային Ղարաբաղի հակամարտության խաղաղ կարգավորման ուղիների որոնման գործում՝ մասնավորապես, ԵԱՀԿ Մինսկի խմբի ձևաչափով: Նախագահները քննարկել են նաև երկկողմ օրակարգի հարցեր՝ վերահաստատելով երկկողմ տրամադրվածությունը ընդլայնել փոխշահավետ համագործակցությունը տարբեր ոլորտներում», ասվում էր Կրեմլի տարածած մամլո հաղորդագրությունում:

Իր հերթին, Նիկոլ Փաշինյանն էլ երեկ ավելի վաղ անդրադարձել է Պաշտպանության նախարարի՝ նախօրեին արած հայտարարությանը: Ապրիլյան քառօրյա պատերազմի տարելիցի կապակցությամբ այսօր Եռաբլուր զինվորական պանթեոնում էին զոհվածների հարազատներն ու բարձրաստիճան պաշտոնյաները՝ Նիկոլ Փաշինյանի գլխավորությամբ:

Հիշեցնենք, որ Դավիթ Տոնոյանը օրերս Նյու Յորքի հայ համայնքի հետ հանդիպման ժամանակ ղարաբաղյան խնդրի կարգավորման մասին խոսելիս ասել էր․ «Տարածքներ խաղաղության դիմաց ձևաչափը ես այսօր վերաձևակերպել եմ, մենք հակառակն ենք անում՝ նոր պատերազմ, նոր տարածքների դիմաց»։ Հարցին, թե արդյոք Հայաստանը փոխում է հռետորաբանությունը, Փաշինյանը պատասխանել է․ «Դավիթ Տոնոյանի հայտարարության շուրջ աղմուկը անիմաստ է: Որովհետև, ճիշտն ասած, եթե Դավիթ Տոնոյանն այլ հայտարարություն աներ, ես նրան կազատեի Պաշտպանության նախարարի պաշտոնից։ Ի՞նչ է ասել պաշտպանության նախարարը: Ասել է՝ եթե հանկարծ պատերազմ լինի, մեր ձգտումը պետք է լինի հաղթել այդ պատերազմում։ Եթե հանկարծ Պաշտպանության նախարարը որևէ այլ բան մտածի, ինքը պետք է Պաշտպանության նախարար չաշխատի։ Սա որևէ կերպ ստվեր չի գցում խաղաղ կարգավորման գործընթացի վրա, ընդհակառակը՝ շեշտում է խաղաղ կարգավորման գործընթացի կարևորությունը»:

Ստացվում է, որ Փաշինյան-Ալիև առաջին պաշտոնական հանդիպումից հետո կողմերն անցան պատերազմական թեմայով քննարկումներին, ինչը վկայում է այն մասին, որ կարգավորման գործընթացը, չնակած միջազգային հանրության սպասումներին՝ մնում է բարդ իրավիճակում, և կողմերին այլ բան չի մնում, քան միմյանց ժամանակ առ ժամանակ դրա մասին հիշեցնելը:

Թամար Բագրատունի