«ՍԻԼ ինշուրանսի» պատասխանը՝ մանիպուլյացիոն վերնագրով հոդվածին

Այսօր լրատվամիջոցներից մեկը «Հայկ Մարությանի «լավությունը» Խաչատուր Սուքիասյանին. Ինչո՞ւ են աշխատակիցներին ապահովագրել «Սիլ ինշուրանսում» վերտառությամբ հրապարակում է արել:

Նյութում լրատվամիջոցը գրել է, որ «Երեւանի քաղաքապետարանի ենթակայության տակ գտնվող մանկապարտեզների և շախմատի դպրոցների աշխատակիցների առողջության ապահովագրության ընկերությունը փոխել են։ Եթե նախորդ տարի աշխատակիցների առողջությունը ապահովագրել էր «Նաիրի ինշուրանս» ընկերությունը, ապա այս տարի նրանց ապահովագրել են «Սիլ ինշուրանս» ընկերությունում»։ Նյութի հեղինակ լրատվամիջոցը գրել է, որ այս քայլով Երևանի քաղաքապետ Հայկ Մարությանը լավություն է արել Խաչատուր Սուքիասյանին:

AraratNews.am-ը կապ հաստատեց «ՍԻԼ կոնցեռնի» մամուլի խոսնակ Աննա Մկրտչյանի հետ՝ հարցի վերաբերյալ մեկնաբանություն լսելու համար:

«Նախ պետք է հասկանանք, թե ինչ ասել է «լավություն անել»: Ոչ ոք լավություն չի արել Խաչատուր Սուքիասյանին, եղել է մրցույթ, որի ժամանակ հաղթել է «ՍԻԼ ինշուրանս» ընկերությունը, և ընկերությունն էլ կատարելու է ապահովագրական ծառայություններ»,- ասաց Աննա Մկրտչյանը, նշելով, որ լրատվամիջոցը դիմել է մանիպուլյացիայի՝ բիզնես գործառույթները ներկայացնելով որպես լավություն:

Աննա Մկրտչյանը մեզ ներկայացրեց նաև «ՍԻԼ ինշուրանսի» պատասխանը նշված հրապարակման վերաբերյալ:

«Համաձայն «Գնումների մասին» ՀՀ օրենքի 34-րդ հոդվածի 2-րդ մասի պահանջների՝ հայտարարված մրցույթում առաջին տեղը զբաղեցրած մասնակիցը որոշվում է բավարար գնահատված հայտեր ներկայացրած մասնակիցների թվից` նվազագույն գնային առաջարկ ներկայացրած մասնակցին նախապատվություն տալու սկզբունքով: 2018 թվականին հայտարարված մրցույթի շրջանակում «ՍԻԼ ինշուրանս» ԱՓԲԸ-ն Երեւանի քաղաքապետարանի ենթակայության տակ գտնվող մանկապարտեզների եւ շախմատի դպրոցների աշխատակիցների առողջապահական ապահովագրության ընկերություն ընտրելու մրցույթում ներկայացրել է ամենացածր գնառաջարկը՝ երկրորդ տեղ զբաղեցրած մասնակցից 21 մլն դրամով ցածր գին ներկայացնելով, ուստի համաձայն վերոհիշյալ օրենքի պահանջների՝ զբաղեցրել է առաջին տեղը, հետևաբար կնքվել է պայմանագիր: Հարկ ենք համարում ընդգծել, որ ընկերության փոփոխությունը իսկապես պատահական չէ, քանի որ նոր իշխանությունը հետևողականություն է դրսևորել օրենքով սահմանված կարգով մրցույթն անցկացնելու ուղղությամբ, ինչը սկզբունքորեն բացակայել է նախկին իշխանությունների օրոք:

Նախորդ տարիներին ևս «ՍԻԼ ինշուրանսը», իսկ 2017 թ. մեկ այլ ապահովագրական ընկերություն ևս, մասնակցել են մրցույթին՝ ներկայացնելով ամենացածր գինը, սակայն տարբեր պատճառաբանություններով, անհասկանալի ձևով գնման պահանջի դադարման և նոր մրցույթի հայտարարման և այլ անհեթեթ հիմքերով չեն ճանաչվել հաղթող, այլ հաղթող է ճանաչվել «Նաիրի ինշուրանս» ԱՍՊԸ-ն՝ մրցակից ընկերությունների համեմատ էականորեն բարձր գին տալու պարագայում՝ 2014 թ.՝ 50 մլն դրամ ավելի, 2015 թ.՝ 30 մլն դրամ, 2016-ին՝ 8 մլն դրամ ավելի, այդպիսով առավել խոշոր չափերով վնաս հասցնելով Երևան համայնքի բյուջեին, հետևությունները թողնում ենք իրավապահ մարմիններին»,-ասվում է «ՍԻԼ ինշուրանսի» պատասխանում:

Հարկ է նկատել, որ նախորդ տարիներին տեղի ունեցած չարաշահումների մասին բազմիցս բարձրաձայնվել է, սակայն բոլորն էլ գիտեն, թե ինչպես էին այն ժամանակ լուծվում նման խնդիրները: