Պատերազմի բռնկման արանքում. Ալիևն այդ «նվերը» չպետք է ստանա

Ինչպես հայտնի է, ԵԱՀԿ Մինսկի խմբի համանախագահները հայտարարել էին, որ աշխատում են Հայաստանի և Ադրբեջանի ղեկավարների բանակցությունները կազմակերպելու ուղղությամբ: Ավստրիայի նախագահ Ալեքսանդր Վան Դեր Բելենը մարտի 29-ին Վիեննայում առանձին հանդիպումներ կունենա Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ: Այդ մասին հաղորդում է Ավստրիայի նախագահի մամուլի ծառայությունը:

«Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը կհանդիպեն Ավստրիայի մայրաքաղաք Վիեննայում մարտի 29-ին», - միաժամանակ երեկ հայտնեց ռուսաստանյան «Ինտերֆաքս» գործակալությունը` վկայակոչելով Ավստրիայի մայրաքաղաքում գտնվող դիվանագիտական աղբյուրները:

Այն փաստը, որ մարտի 29-ին Հայաստանի և Ադրբեջանի ղեկավարները գտնվելու են Վիեննայում, հաստատում է նաև այդ երկրի նախագահ Ալեքսանդր Վան Դեր Բելենի պաշտոնական կայքը: Դրա համաձայն մարտի 29-ին` ժամը 15-ի սահմաններում Ավստրիայի նախագահը Վիեննայի կենտրոնում գտնվող «Հոֆբուրգ» պալատում ընդունելու է Հայաստանի վարչապետ Նիկոլ Փաշինյանին: «Դրանից երեք ժամ անց Վան Դեր Բելենը կընդունի Ադրբեջանի նախագահ Իլհամ Ալիևին», - տեղեկացնում է Ավստրիայի նախագահի կայքը:

Առայժմ, պաշտոնական Երևանն ու Բաքուն չեն հաստատել մարտի 29-ին հանդիպելու մասին տեղեկությունները, սակայն ըստ ամենայնի այդ հանդիպումը կկայանա:
Կարելի է ասել, երկար դիվանագիտական փոխհրաձգությունից հետո, տեղի է ունենալու Փաշինյան-Ալիև մի նոր հանդիպում: Վերելակային էյֆորիայից հետո եկել է ավելի սառը դատելու ժամանակը: Կողմերը միմյանց այս ընթացքում մեղադրեցին, Փաշինյանը հնչեցրեց Արցախը բանակցությունների սեղանին վերադարձնելու հարցը, Ալիևը մի քանի անգամ դա մերժեց: Վերջակետը դրեցին համանախագահները, որոնք նշեցին, որ այս պահին նպատակահարմար չէ ձևաչափի փոփոխությունը:
Իրականում, բավական բարդ ու լուրջ պահ է. բանակցությունների շարունակականությունը դադարեցնելուց ու պատերազմի բռնկումից, այսպես ասած՝ մազ է մնացել:

Ամբողջ խնդիրն այն է, որ Ալիևը կձգտի ամեն ինչ բարդել հայկական կողմի վրա, որպեսզի պատերազմ սանձազերծելու քարտ-բլանշ ստանա: Այդ հնարավորությունը կլինի մեծ նվեր Ալիևին:

Ուրեմն, ամեն ինչ պետք է անել, որպեսզի Ալիևն այդ նվերը չստանա:

Թամար Բագրատունի