Արամ Սիմոնյանի օրերը հաշված են.երբ է նա հեռանում

Երբ ամիսներ շարունակ քաղաքական ու հասարակական որոշ շրջանակներ ահազանգում են, որ վերջին տասն ամիսներին Հայաստանում գրեթե ամեն հարց լուծվում է քաղաքական հողի վրա եւ Հայաստանում քաղաքական հետապնդումներն անասելի չափերի են հասել ու սիրո եւ համերաշխության կարգախոսով իշխանության եկածները ատելության ու թշնամանքի մթնոլորտ են ձեւավորում, նորաթուխ իշխանության ներկայացուցիչները ասում են, թե բավ է զազրախոսեք, որ այդ մարդիկ հակահեղափոխականեր են եւ այլն:

Սակայն այսօր Նիկոլ Փաշինյանն անձամբ է խոստովանել, որ Արամ Սիմոնյանի նկատմամբ քաղաքական հետապնդում է իրականացվում: Իհարկե, նա այսքան ուղիղ չի ասել, բայց հայտարարել է, որ, այո, քաղաքական որոշում է կայացված եւ մի շարք ռեկտորներ չեն կարող չենթարկվել դրան: Փաշինյանը անուններ չի տվել, բայց ասելիքից պարզ է, որ խոսքը Սիմոնյանի մասին է:
«Նախ պետք է ամբողջ կրթական համակարգը ապաքաղաքականացվի՝ սկսած բուհական համակարգից՝ մինչև դպրոցական համակարգ։ Եվ մենք պետք է շատ հստակ ասենք սա։ Օրինակ, այն ռեկտորները, որոնք բարձրագույն կրթական համակարգը դարձրել են ինչ-որ կուսակցական բջիջներ, էն ռեկտորները, որոնք ուսանողների վրա դռներ են փակել, էդ ռեկտորները նոր Հայաստանում անելիք չունեն։ Սա իմ շատ հստակ դիրքորոշումն է, և մենք չպետք է վախենանք այդ դիրքորոշումն ասել։ Թող դռներից ճանկռեն, իրենց սեղաններից ու բազկաթոռներից ճանկռեն, բայց իրենք նոր Հայաստանում անելիք չունեն։ Թող գնան, իրենց համար գտնեն այլ աշխատանք, այլ անելիք, այլ առաքելություն», կառավարության արտահերթ նիստի ընթացքում հայտարարել է Փաշինյանը ու կարդացել նաեւ Սիմոնյանի դատավճիռը. «Չի կարող Հայաստանի Հանրապետությունում ուսանողի վրա դուռ փակած ռեկտորը կամ կրթական պրոցեսը կուսակցականացրած ռեկտորը և ղեկավարությունը շարունակի Հայաստանում աշխատել։ Չի կարող այդպիսի բան լինել, և հեղափոխությունը սկսվել է այս պահանջով և ավարտվելու է այս պահանջով։ Ինչքան էլ բողոքեն, չկա տարբերակ։ Սա քաղաքական որոշում է, այո, և այդ քաղաքական որոշումը, մի շաբաթ այս կողմ, մի շաբաթ այն կողմ, կիրագործվի։ Որևէ մեկը հանկարծ չմտածի, թե մենք կմոռանանք՝ ինչի համար ենք հավաքվել։ Հույս չունենանք»,- եզրափակեց վարչապետ Փաշինյանը։

Ինչ խոսք՝ այս ելույթից հետո այլեւս որեւէ մեկը այս իշխանությունից չի կարող թմբկահարել Հայաստանում ժողովրդավարության մասին, քանի որ դա նրանց թեթեւ ձեռամբ արդեն գերեզման է ուղարկվել: Փաշինյանի նյարդայի այլ ելույթից կարելի է նաեւ հետեւություն անել, որ Արամ Սիմոնյանի դեմ սկսված արշավը դատապարտված է ձախողման, փաստորեն, Պետական վերահսկողական ծառայությունը ի հեճուկս Դավիթ Սանասարյանի մեղադրանքների լուրջ խախտումներ չի հայտնաբերել ԵՊՀ-ում, որի հիման վրա կարելի է ազատվել Սիմոնյանից, իսկ այս դեպքում այլ բան չի մնում, քան հրապարակային ղժղժալն ու սպառնալիքներ ուղղելը:

Անի Սահակյան