Ստախոսը՝հեղափոխության պատուհաս

Նիկոլ Փաշինյանի ամենասիրելի կադրերից Գարիկ Սարգսյանը, նույն ինքը՝ Արարատի մարզպետը, պատուհաս է դառնում հեղափոխական իշխանության գլխին: Նշանակման առաջին օրվանից նա հաճախակի է հայտնվում սկանդալների մեջ ու չի կարելի ասել, թե միշտ ջրից չոր է դուրս գալիս, ճիշտ հակառակը՝ բոլոր պատմություններում <<ապացուցվում>> է նրա մեղքը, սակայն Նիկոլ Փաշինյանը չի ազատվում այդ գլխացավանքից թերեւս մի պատճառով, որ Գարիկ Սարգսյանը իշխանաբեր առաջ ծիծեռնակն է, նա ՀՀԿ-ի մենաշնորհը կոտրեց ու Նոր Կյանքի գյուղապետ ընտրվեց թավշյա հեղափոխությունից մեկ տարի առաջ: Հավանաբար այս փաստից էլ ոգեւորված Գարիկ Սարգսյանը աջ ու ձախ թուրը կտրում է՝ վստահ լինելով, որ մնալու է անպատիժ: Սակայն իր բոլոր կամայականություններով հանդերձ պարզվում է՝ երիտասարդ այս պաշտոնյան անուղելի ստախոս է: Արդեն հրապարակային մի քանի հայտարարություններով նա ապացուցել է այդ փաստը: Օրինակ տարեվերջյան պարգեւատրումների առիթով նա կտրականապես հերքում էր, թե ստացել է աշխատավարձի 105 տոկոսի չափով պարգեւավճար, պնդում էր, թե ամեն ինչ կատարվել է օրենքի շրջանակներում, մինչեւ, որ Տարածքային կառավարման նախարար Սուրեն Պապիկյանն անվանական չնախատեց այդ մասին: Մարզպետը անկաշկանդ փորձեց ստել նաեւ օրերս մի քանի տեսախցիկների եւ վարչապետի առջեւ: Երբ Փաշինյանը անակնկալ այց էր կատարել Արարատի մարզ եւ նրան մոտեցավ Ավշար գյուղում մի քանի օր դասադուլ հայտարարած դպրոցի կոլեկտիվի ներկայացուցիչ՝ Փաշինյանին տեղեկացնելու իրենց դպրոցի իրավիճակը ու հայտնելու, որ մի քանի օր է դասադուլ է, մարզպետը առանց երկնչելու պատասխանեց, թե մեկ օր է դասադուլ է, այնինչ լրատվականները, մի քանի օր ուղիղ եթեր էին մտնում դպրոցից, որի մասին, կարծում ենք՝ տեղյակ էր նաեւ Փաշինյանը: Մարզպետի սուտը բռնվել է նաեւ մեկ այլ դրվագով: Նա դեռեւս թավշյա հեղափոխության օրերին հարթակից հայտարարեց, թե ՀՀԿ-ական նախկին պատգամավոր Արայիկ Գրիգորյանը՝ Ավշարի Արայիկը զանգվածային ցույցերի օրերին Ոսկետափ համայնքում կնոջ է հարվածել․«Այդ կինը տղամարդ կին է , նա նախաձեռնում է ճանապարհ փակել հենց իր խանութի դիմաց, և ռեյտինգային համակարգով ընտրված Արայիկ Գրիգորյանը, ով շատ հայտնի է որպես Ավշարի Արայիկ, իր հաստավզերի հետ գալիս է ճանապարհը բացելու , այդ կինը չի զիջում, և հարվածում են այդ կնոջը», - բառացիորեն ասել էր Սարգսյանը։ Մեջբերմանը Hraparak.am-ի հետ զրույցում արձագանքել է Սուսաննա Սահակյանը, որի անունը հնչեցրել է մարզպետը։ Սահակյանը հերքում է․ Գրիգորյանը իրեն չի հարվածել, իսկ հարկայինից իրեն չեն տուգանել․ « Թեկուզ ինքը հայտարարել է այդ հանրահավաքին, հիմա ես եկել եմ, որ այդ լուրը հերքեմ։ 10 ամիս է, ես ճնշումների մեջ եմ, ամեն օր մեր խանութում այս խոսակցությունը , բոլորը որ լսել են, բոլորը կարեկցանքի խոսքերով են գալիս, թե իբր ինձ խփել են, տուգանել են, նման ոչ մի բան չի եղել»։ Կինը մանրամասն պատմել է, թե ինչպես է պահանջել Գարիկ Սարգսյանից դեռեւս ամիսներ առաջ, որպեսզի հերքի իր հայտարարությունը, սակայն, Գարիկ Սարգսյանը հրաժարվել է.<<Ես ասացի՝ Գարիկ Սարգսյանին ասեք, թող գա, թող գա ինձ պատասխան տա, ինքը ինձ ճանաչո՞ւմ է, իմ բերանից ինչո՞ւ է նա խոսք ասել ։ Ասել եմ, որ կարող եմ դատական հայց տալ, կարող եմ ամեն ինչ անել, բայց չեմ անում, ես գործ տվող չեմ, ես ընդամենը ուզել եմ իրենցից լսել»,- ասել է կինը: Կարծում ենք՝ մեկնաբանություններն ավելորդ են: Անի Սահակյան