Փաշինյանը փորձում է հերթական խայտառակ ծրագիրը փաթաթել հանրության վզին. Iravunq.com

Հերթական աբսուրդ գրառումն է արել ՀՀ վարչապետ Նիկոլ Փաշինյանն իր ֆեյսբուքյան էջում: Չնայած, երեւի թե գրառումը չէ աբսուրդ, այլ վարչապետը պարզապես փորձում է հերթական ոչ պոպույլար որոշումը, որից նաեւ ապօրինության հոտ է գալիս, փաթաթել մարդկանց վզին կամ իր համար ձեւական արդարացում սարքել: Այսպես, Փաշինյանը դիմում է քաղաքացիներին. «Այսօր Հայաստանում 11 հազար 281 նպաստառու ամեն ամիս 100 հազար եւ ավել դրամի չափով վարկ է փակում: Ոմանք՝ ամիսը 100 հազար, ոմանք 400 հազար, ոմանք մեկ միլիոն դրամ: Հիշեցնեմ՝ խոսքն այն մարդկանց մասին է, ովքեր պաշտոնապես համարվում են աղքատ եւ 18-ից 40 հազար դրամ են ստանում, որպես սոցիալական աջակցություն: Այս ավելի քան 11 հազար մարդկանց նպաստ տալու համար պետությունը ծախսում է տարեկան մոտ 4.5 միլիարդ դրամ: Ասեմ, որ զինված ուժերում աշխատավարձերը 10 տոկոսով բարձրացնելու համար տարեկան հարկավոր է 9 միլիարդ դրամ: Հիմա՝ ի՞նչ եք ասում, սիրելի հայրենակիցներ, մեր վերը հիշատակված 11 հազար 281 հայրենակիցները պե՞տք է զրկվեն նպաստից, թե ոչ»: Նախ հետեւենք շարադրանքին, որը վատ «աֆյորայի» տեսք ունի: Նպաստառուների հարցը բերել-կապելով բանակի աշխատավարձերի հետ, էժան փորձ է արված՝ խաղալ մարդկանց զգացմունքների վրա. ո՞վ չի ասի, թե՝ կեղծ նպաստառուից պետք է փողը վերցնել եւ տալ բանակում ծառայողին: Բայց գանք մյուս կողմից: Նախ. վարչապետը պետք է բարի լիներ՝ բանակային աշխատավարձերը բարձրացնել առանց որեւէ բանի հետ կապելու, ընդ որում, ոչ թե 10 տոկոսով, այլ առնվազն կրկնակի: Ինչի՞ հաշվին, շատ պարզ է. խոստացածի պես տնտեսությունը զարգացներ, հարկերն ավելացներ եւ ոչ միայն բանակին, այլ մյուս բորորին ավելի շատ աշխատավարձ եւ թոշակ վճարեր: Չի՞ կարող, ուրեմն թող այդպես էլ ասի, որ տված բոլոր «հեղափոխական» խոստումները «փուչիկ» են: Ինչ վերաբերում է 11 հազար 281 նպաստառուներին, որոնք ամսական հարյուր հազարներով վարկ են փակում, ապա դրա հարցն էլ է շատ պարզ: Կա՞ ապացույց, որ այդ մարդիկ օրինազանց են, կեղծ փաստաթղթերով են նպաստ ստանում: Եթե այո, ապա խոսքը 11 հազար 281 կեղծ նպաստառուի եւ դրանց նպաստները «սարքած» մի քանի հազար պետծառայողի ներգրավմամբ հանցագործության մասին է: Ուրեմն, պետք է պարզապես բացահայտել եւ ոչ թե պարզապես միայն նպաստից զրկել, այլ՝ բոլոր մեղավորներին պատժել: Այսինքն,վարչապետի որոշելով չէ սրա-նրա նպաստը կտրելը, դա օրենքի պարզելիք հարց է: Ընդ որում հաշվի առնելով, որ եթե այս պահին կան կեղծ նպաստառուներ, դրա մեղքը նաեւ Փաշինյանի վրա է. բա այս մեկ տարում ինչո՞ւ նրանց չեք «մաքրել»: Բայց նաեւ նկատենք. եթե վարչապետը սկսել է այդ նպաստառուների հարցով նման հրապարակային խաղերի մեջ մտնել, դա նաեւ ակնարկ է, որ այդ 11 հազար 281 նպաստառուին կեղծարարության մեջ մեղադրելու շանսերը քիչ են: Այսինքն, նրանք նպաստ են ստանում օրենքի շրջանակներում, ինչն ակնարկ է, որ փորձ է արվում նպաստից զրկել կարիքավորին: Ինչ վերաբերում է վարկերին, ապա այստեղ շատ լուրջ հարց կա. այդ ինչո՞ւ են բանկերը կարիքավոր մարդկանց կամ առնվազն՝ նրանց անունով վարկ տվել:հա, նաեւ չմոռանանք, որ նման վարկերը կարելի է ինչ-որ պահի նաեւ անհուսալի ձեւակերպել, եւ ոմանք նման խաղի վրա կարող են մեծ փողեր գրպանել: