Բակո Սահակյանը շեշտեց, իսկ Փաշինյանն անտեսեց գլխավորը
Հայաստանի և Լեռնային Ղարաբաղի անվտանգության խորհուրդների համատեղ նիստում՝ մարտի 12-ին, ինչպես հայտնի է, ելույթ է ունեցել Արցախի Հանրապետության նախագահ Բակո Սահակյանը: Նրա ելույթը մի կարևոր ուղերձ ունի, որը, թերևս, ներկայացնում է այսօր Հայաստանի ու Արցախի իշխանությունների միջև արցախյան հարցում մոտեցումների որոշակի տարբերությունը: «Մեր առաջնահերթ խնդիրը եղել է, կա, վաղն էլ կմնա Արցախի անկախության միջազգային ճանաչումը», ասել է Բակո Սահակյանը: Հատկանշական է, որ Նիկոլ Փաշինյանի ելույթում Արցախի միջազգային ճանաչման մասին հիշատակումներ չեն լինում և վերջին ելույթում էլ չի եղել: Պատահականությո՞ւն է սա... Ըստ ամենայնի՝ ոչ, որովհետև, եթե Փաշինյանը, որպես հիմնական բանակցող այդ մասին հետևողականորեն չի նշում, դա կարծես իր փոխարեն անում է Ստեփանակերտը: Բայց այստեղ խնդիր կա. Առանց Հայաստանի աջակցության Արցախի միջազգային ճանաչման գործընթացը չի կարող լիարժեք լինել, որ հիմնական բեռը հենց Հայաստանի ուսերին պետք է լինի: Ինչ է ստացվում ուրեմն, Արցախը կարևորում է միջազգային ճանաչումը, սակայն Հայաստանը դա չի՞ կարևորում, կամ այնքան էլ չի՞ կարևորում... Չէ՞ որ բանակցություններին մասնակցելն ամենևին էլ չի բացառում Արցախի միջազգային ճանաչման գործընթացը, որ կարող է ծավալվել: Իհարկե, կարող են հակադարձել, թե Հայաստանը կարող է բանակցություններին շարունակել մասնակցել, իսկ Արցախի միջազգային ճանաչման մասին առանց բարձրաձայնելու աշխատանքներ իրականացնել: Սակայն ամբողջ խնդիրը նրանում է, որ պաշտոնական Երևանը, Փաշինյանի հեղափոխությունից հետո, կարծես, չի ցանկանում հիշատակել Արցախի միջազգային ճանաչման անհրաժեշտության մասին այնպիսի ինտենսիվությամբ, ինչպես դա արվում էր նախկինում: Բացի այդ, եթե անգամ այդ գործընթացի մասին չպետք է բարձրաձայնել հաճախ, պետք է հայտարարել, որպես ադրբեջանական կողմն էլ գիտակցի, որ հայկական կողմի համար, միևնույն է, Արցախի ապագան Ադրբեջանի հետ անհնարին է: Բակո Սահակյանի ելույթից մի հատված, մինչդեռ, ցույց է տալիս, որ Արցախն իսկապես ունի միջազգային ճանաչման հարցում միահամուռ աշխատանքի իրագործման անհրաժեշտություն: Նա ասում է. «Մենք այս ընթացքում կարևորել ենք, որ անհրաժեշտություն ունենք համազգային օրակարգ ունենալու, և ես ավելի քան համոզված եմ, որ այսօրվա մեր համատեղ նիստը նպաստելու է այդ ազգային օրակարգի ձևավորմանը: Ինչպես այս տարիների ընթացքում եղել է, անփոփոխ են մնացել նաև այդ ազգային օրակարգում դասակարգված մեր առաջադրանքները: Եվ կարծում եմ՝ բոլորդ համամիտ կլինեք, որ եղել է, կա և վաղն էլ կմնա մեր հայրենիքի համար իբրև առաջնահերթ խնդիր Արցախի Հանրապետության անկախության միջազգային ճանաչումը, և այսօրվա համատեղ նիստի ընթացքում մենք հնարավորություն կունենանք նաև անդրադառնալու, թե ներկայիս շրջանում տեղի ունեցող այդ ուղղությամբ քննարկումներն ինչպես են ընթանում»: Պաշտոնական Երևանի ու Ստեփանակերտի դիրքորոշումներում որոշակի այս տարբերությունը վկայում է այն մասին, որ այնուամենայնիվ, Ստեփանակերտն ունի անհանգստություններ ընթացող բանակցությունների նկատմամբ: Թամար Բագրատունի
Հետևեք մեզ Viber-ում
