Մեզ ասեցին՝ «հանգիստ նստեք տեղներդ» ու մենք այդպես էլ կվարվենք

Մարտ 9-ի օրը կարելի է իսկապես խիստ ուշագրավ համարել Արցախի համար՝ հայկական կողմից հղված «մեսիջների» առումով: ԵԱՀԿ Մինսկի խմբի հայտարարությունը, որը կոնկրետ հայկական կողմի վերջին ամիսների կատարած, այսպես ասած՝ աշխատանքը ջուրը գցեց, Արցախի՝ բանակցություններում մասնակցության առումով, ունեցավ իր կոնկրետ հետևանքները ու բավական արագ: Բացի կարևոր ուղերձներից, որոնք հղեցին միջնորդները, առանձին ուսումնասիրության է արժանի պաշտոնական Երևանի արագ ռեակցիան: Հանկարծ նույն օրը Ազգային անվտանգության ծառայության տնօրեն Արթուր Վանեցյանն է մեկնաբանում օրեր առաջ Լեռնային Ղարաբաղում իր հնչեցրած հայտարարությունն այն մասին, որ «Ոչ մի թիզ հող հետ տալու նպատակ չունենք, այլ ընդհակառակը՝ մեր հողերում պետք է ապրեն մեր հայրենակիցները»: Պատասխանելով «Ազատության» գրավոր հարցմանը՝ «արդյոք կարո՞ղ ենք ասել, որ Ձեր կողմից Արցախում վերջերս արված հայտարարություններն արտահայտում են հայկական կողմի պաշտոնական դիրքորոշումը նաև բանակցային սեղանին», ԱԱԾ տնօրենը պարզաբանել է․ «Ես արդեն առիթ ունեցել եմ այս հարցով հանդես գալ համապատասխան մեկնաբանությամբ: Կրկնեմ, որ այդ հայտարարությունը կատարել եմ որպես պրոֆեսիոնալ սպա, որին մտահոգում են Ադրբեջանի հռետորաբանությունը և այնտեղից հնչող սպառնալիքները, որոնք խարխլում են բացառապես խաղաղ ճանապարհով ԼՂ հիմնախնդրի կարգավորմանն ուղղված ջանքերը: Իսկ ԼՂ հիմնախնդրի կարգավորման գործընթացում Հայաստանի պաշտոնական մոտեցումն արտահայտում են ՀՀ վարչապետն ու արտգործնախարարը, ովքեր էլ ներգրավված են խաղաղ գործընթացում»: Հիշեցնենք, որ օրեր առաջ աշխատանքային այցով Արցախ մեկնած Արթուր Վանեցյանը Արցախի նախագահ Բակո Սահակյանի հետ այցելել էր Հադրութից հարավ ընկած՝ Արաքս գետին հարող հատված, ուր, ըստ Արցախի հանրային հեռուստատեսության, կառուցվում է նոր բնակավայր՝ Արաքսավանը, 150 առանձնատներով և համայնքային նշանակության շինություններով: «Ծրագիրը, որը անվանում ենք վերաբնակեցման ծրագիր, որը իմ և ոչ միայն իմ, այլև բոլորի օբյեկտիվ գնահատականով՝ մեր երկրի անվտանգության հիմնական երաշխիքն է լինելու, որովհետև այն խոսքերը, արտահայտությունները և այն մարդիկ, որոնք միշտ շահարկում են այն թեման, որ հողերը հետ են տալու, բանակցելու են, զիջելու են և այլն, այդ ծրագրի իրականացման արդյունքում, մենք հստակ ուղերձ ենք տալիս ողջ հայ ժողովրդին և ողջ աշխարհին, որ մենք ոչ մի թիզ հող հետ տալու մտադրություն չունենք, այլ ընդհակառակը՝ մեր հողերում պետք է բնակվեն մեր հայրենակիցները և շենացնեն մեր երկիրը», ասել էր Վանեցյանը։ Նույն օրը մեկ այլ հայտարարություն էլ պաշտոնական Երևանը հնչեցրել է ՀՀ ԱԳՆ մամլո խոսնակի մակարդակով: Արտաքին գործերի նախարարության մամուլի խոսնակ Աննա Նաղդալյանը, մասնավորապես, ասել է. «Այն պայմաններում, երբ Հայաստանի վարչապետը Եվրոպական խորհրդարանում հայտարարում է մեր տարածաշրջանում երկխոսության, հանդուրժողականության և փոխզիջման մշակույթի ներդրման անհրաժեշտության մասին, Բաքվից սպառնում են, որ կարող են իրենց հասարակությանը պատրաստել ոչ թե խաղաղության, այլ հիմնախնդրի այլ ձևերով հանգուցալուծման: Նման հռետորաբանությունը, ինչպես նաև առավելապաշտական, ոչ կառուցողական դիրքերից հնչող հայտարարությունները չեն նպաստում բանակցությունների համար համապատասխան մթնոլորտի ձևավորմանը: Հայաստանը բազմիցս հայտարարել է, որ չի ընդունում նման մոտեցումները, ինչպես նաև զենքի փողի սպառնալիքի ներքո բանակցությունների պարտադրանքը»: ԱԳՆ մամուլի խոսնակը ասել է, որ Հայաստանը մշտապես բարձրաձայնել է իր հանձնառությունը և սատարել է ԵԱՀԿ Մինսկի խմբի համանախագահության հովանու ներքո հիմնախնդրի բացառապես խաղաղ կարգավորմանը, «որում մեր առաջնահերթություններն են Արցախի անվտանգությունն ու կարգավիճակը», շարունակելով. «Մեր այդ հանձնառության վառ ապացույցներից է, որ Հայաստանում տեղի ունեցած թավշյա հեղափոխությունից հետո խաղաղության գործընթացը ոչ թե կասեցվեց, այլ` նոր դինամիկա ստացավ: Խաղաղության մթնոլորտի ձևավորումը, ռիսկերի նվազեցման և միջադեպերի կանխարգելման մեխանիզմների և փոխվստահության ամրապնդման միջոցառումների ներդրումը, ինչպես դա ամրագրվել է Դուշանբեի, իսկ մինչ այդ նաև Վիեննայի ու Սանկտ Պետերբուրգի գագաթաժողովների շրջանակներում, շարունակում են մնալ առարկայական», հավելել է Նաղդալյանը: Փաստորեն, համանախագահների հայտարարության ֆոնին պաշտոնական Երևանը հանդես եկավ մի շարք ճշգրտող գնահատականներով: ԱԱԾ-ի ղեկավարը ֆիքսեց, որ, այնուամենայնիվ, պաշտոնական դիրքորոշում արտահայտում են վարչապետն ու արտգործնախարարը, իսկ ԱԳՆ-ն էլ իր խոսնակի միջոցով հիշեցրել, որ Հայաստանը հավատարիմ է խաղաղ կարգավորմանը, իհարկե, հիշատակելով՝ խաղաղության մթնոլորտի հասնելու մի շարք պայմաններին, ինչպես նաև Վիեննայի և Սանկտ Պետերբուրգի հանդիպումների պայմանավորվածությունները: Ինչ կլինի ապագայում, այն բանից հետո, երբ հայկական կողմին խորհուրդ տվեցին «հանգիստ նստել» տեղում: Մենք այդպես էլ կվարվենք, կշարունակենք գնալ բանակցությունների, բայց պարզ չէ, թե ինչ օրակարգով, եթե Փաշինյանի հիմանական հաղթաթուղթը՝ Արցախի բանակցություններ վերադարձնելը, գոնե այս պահին դուրս է մնացել օրակարգից: Թամար Բագրատունի