«Ադրբեջանի զինված ուժերն այսօր առավոտյան 200 կմ-ից թիրախավորել և խոցել են 30 մետր ճշգրտությամբ » .Վան Համբարձումյան

«Ադրբեջանի կողմից իրականացվող զորավարժություններն իրենց բնույթով աննախադեպ չեն, քանի որ հայկական կողմն ականատես է եղել ավելի մեծածավալ զորավարժությունների, որտեղ ներգրավված են եղել մինչև 20 հազար մարդ։ Դրանք  տարբերվում է տեխնիկական միջոցներով, որը նախկինում մերձկասպյան թուրքերը չեն ունեցել, իսկ այսօր ունեն։ Երեկ զորավարժություններին մասնակցել են տանկային ստորաբաժանումները, ինչը մեզ համար նորություն չէ։ Այսօր առավոտյան «Պոլոնեզի» հաշվարկներն են տագնապով արվել, որը նոր են ձեռք բերել Բելառուսից։ Մյուս առումներով այս զորավարժություններում աննախադեպ ոչինչ չեմ տեսնում»,-Հայելի ակումբում  լրագրողների հետ հանդիպմանը նշեց  առաջին հետախուզադիվերսիոն խմբի հիմնադիր-հրամանատար Վովա Վարդանովը: «Զորավարժության ընթացքում զինվորները փորձելու են նոր դիրքեր գրավել և կանգնեցնել հակառակորդի հակահարվածը։Այս ամենն իրականության մեջ եղել է 2016 թվականի ապրիլին։ Իրականության մեջ որևէ աննախադեպ բան չկա, թուրքը պատրաստվում է, և բնական է, որ հակառակորդը ձեռք է բերել նոր զենք և դրանք կիրառում է»,- նկատեց Վովա Վարդանովը։ «Այս զորավարժություններն իրենց բնույթով ու տեխնիկական հագեցածությամբ աննախադեպ են։Աշխարհաքաղաքական իրավիճակը զգալիորեն զարգանում է, ինչը շատ բաների մասին կարող է խոսել, որ այս զորավարժությունները հենց այնպես չեն անցկացվում։ Այս զորավարժություններում ադրբեջանական զինուժի առջև դրվել է բավականին բարդ մարտական առաջադրանք։ Եթե նախկինում Ադրբեջանի զինված ուժերը նախապես ստանում էին օբյեկտի տվյալները և խոցում, հիմա ադրբեջանական հաշվարկների առջև ավելի բարդ խնդիր կա, նրանք են հայտնաբերում և խոցում։ Այսօր առավոտյան 200 կմ-ից թիրախավորել և խոցել են 30 մետր ճշգրտությամբ։ Թիրախներն ընտրված են հայկական դիրքերի նմանությամբ»,- սա էլ ռազմական փորձագետ Վան Համբարձումյանի կարծիքն է: «Այս զորավարժություններն աննախադեպ են նաև նրանով, որ, եթե նախկինում ադրբեջանական ավիացիան աշխատում էր վերգետնյա թիրախների վրա, ապա այսօր նրանք գնել են հատուկ թիրախներ, բարձրացրել օդ և կործանիչներով խոցել, այսինքն՝ պատրաստվում են օդային մարտերի։Առաջին անգամ կիրառվել է հակատանկային կառավարման կոմպլեքս, որը կարող է թիրախավորել 2 կմ-ի վրա։ Զինատեսակներ կան, որոնք երբեք չեն կիրառվել, դրանք արդեն խոսում են շատ բաների մասին, սա նշանակում է, որ, երբ պատերազմ սկսվեց, ադրբեջանական զինուժն իր ուժերը սահմանագծից տեղափոխելու է մինչև Երևանի խորքերը։ Չպետք է մոռանանք, որ Ադրբեջանի նախագահը հստակ հայտարարել է, որ 2019 թվականը լինելու է վճռորոշ։ Տարին, կարելի է ասել, նոր է սկսվում, բայց նրանք արդեն երրորդ զորավարժությունն են անցկացնում:Պատահական չէ, որ այս զորավարժություններն ընթանում են Փաշինյան-Ալիև, Մնացականյան-Մամեդյարով հանդիպմանն ընդառաջ, որը խոսում է այն մասին, որ Ադրբեջանը ձգտում է ճնշում գործադրել հայկական կողմի վրա, և այդ ճնշումները կլինեն»,- ընդգծեց Վան Համբարձումյանը։