ՆԱՏՕ-ի տեսանկյունից որևէ քաղաքական խոչընդոտ չկա խորացնելու հարաբերությունները Հայաստանի հետ. Ջեյմս Ապաթուրայ
ՆԱՏՕ-ի տեսանկյունից որևէ քաղաքական խոչընդոտ չկա խորացնելու հարաբերությունները Հայաստանի հետ, և ամեն ինչ կախված է երկու կողմերի ներուժից, ռեսուրսների և ցանկությունից: Այս մասին այսօր մամուլի ասուլիսին ասաց Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապաթուրայը` պատասխանելով Tert.am-ի հարցին, թե ինչ հնարավորություններ է տեսնում ՆԱՏՕ-Հայաստան համագործակցության խորացման հարցում, և այս առումով արդյոք կան խոչընդոտներ: «Ընդհանուր առմամբ, մեր գործունեության մակարդակը և նաև մեր հավակնությունները հենց այն մակարդակում են գտնվում, որ երկու կողմից էլ ցանկալի են համարվում: Երկու նախարարների հետ զրույցների ընթացքում ասացի, որ եթե ցանկություն արտահայտվի ավելին անելու, ապա եկե՛ք միասին ուսումնասիրենք այդ հնարավորությունները: Քննարկեցինք լրացուցիչ համագործակցության հնարավորությունները ՆԱՏՕ-ի, Հայաստանի և այլ գործընկերների միջև: Անհերքելի է՝ ՆԱՏՕ-ի առաքելությունները և գործողությունները զարգանում են և հնարավոր զարգացումներ կարող են լինել Հայաստանի՝ դրանց մասնակցության տեսանկյունից, բայց դա հարյուր տոկոսանոց Հայաստանի կողմից ընդունվելիք որոշումն է»,- պատասխանեց նա: Ապաթուրայը վերահաստատեց, որ ՆԱՏՕ-ն չի միջամտում հակամարտությունների հանգուցալուծմանը և միջադեպերին չի արձագանքում: Նա նշեց, որ սատարում են Մինսկի խմբի աշխատանքին, և ՆԱՏՕ-ն բացարձակապես պնդում է, որ այս հակամարտությունը միայն խաղաղ ճանապարհով կարող է լուծվել: Ջեյմս Ապաթուրայը համաձայնեց ՀՀ-ում Գերմանիայի դեսպանի այն մտքի հետ, որ ՆԱՏՕ-ն փորձագիտական շրջանակներում է հայտնի: «Սա մի մարտահրավեր է, որի հետ բախվում ենք բոլոր երկրներում, այդ թվում՝ իմ երկրում»,- ասաց նա և նշեց, որ հաղորդակցության առավել արդյունավետության հասնելու մասին ինքը ևս մտածել է, և կարևորեց բացատրել, թե ինչ է անում ՆԱՏՕ-ն: Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչը հաստատեց, որ Վրաստանում անցկացվելու են զորավարժություններ, բայց Հայաստանի մասնակցության վերաբերյալ պատասխան չուներ: Ինչ վերաբերում է կանանց մասնակցության վերաբերյալ Հայաստանի ծրագրերին, ապա նա նշեց, որ այս կառավարությունը գործողությունների ծրագիր է մշակել այդ նախաձեռնության համար: «Այսօր ինձ ներկայացված վիճակագրությունից ելնելով՝ Հայաստանը բավականին բարվոք վիճակում է արդեն այդ իմաստով, և իսկապես շոշափելի քայլեր են ձեռնարկվելու զինվորագրելու կանանց՝ դա անելով ավելի բարձր մակարդակով և ավելի ընդգրկուն»,- ասաց նա: Անդրադառնալով այս տարի անհատական գործողությունների գործունեության հինգերորդ ծրագրի ավարտվելուն և հարցին, թե ինչպես կգնահատի վեցերորդ ծրագրի նախապատրաստական աշխատանքները, նա ասաց, որ լիովին բավարարված են ծրագրի գործընթացով, և զբաղված են արդյունքների գնահատմամբ: «Մենք ուզում ենք երաշխավորել, որ այդ ծրագիրը կսևեռվի այն գերակայությունների վրա, որոնց շուրջ երկուստեք համաձայնության ենք եկել, և դա կբերի Հայաստանի համար շոշափելի արդյունքների»,- ասաց նա: Ինչ վերաբերում է Ֆրանսիայի նախագահ Մակրոնի նախաձեռնությանը՝ եվրոպական միասնական բանակի հարցում, նա նշեց. «ՆԱՏՕ-ի վիճակը լավ է: Տարիներ շարունակ հայտարարել ենք, որ չենք սատարում անհարկի կրկնօրինակումները, քանի որ ռեսուրսները բավարար չեն լինի կրկնօրինակելու այն, ինչ արդեն արվում է ՆԱՏՕ-ի կողմից»: Ըստ ՆԱՏՕ-ի ներկայացուցչի՝ Կենտրոնական Ասիայում շատ հետաքրքիր քաղաքական զարգացումներ են տեղի ունենում: «Քաղաքական անցումը Ուզբեկստանում հետաքրքիր զարգացումներ է բացում տարածաշրջանում, որոնք մենք սատարում ենք: Ես զգում եմ, որ զարգացումները մասամբ բերելու են Աֆղանստանում ավելի շատ ներգրավվածությանը, ինչը դրական զարգացում ենք համարում, իսկ անհերքելիորեն ցանկացած դրական քաղաքական զարգացում իր արձագանքները կստանա տարածաշրջանում»,- ասաց նա:
Հետևեք մեզ Viber-ում
