Պուտինը «շոյում է» ռուսական ձևով

Ադրբեջանի ԱԳՆ-ն ռուսական կողմին է հասցրել Բաքվի դժգոհությունը՝ կապված Մոսկվայում անցկացված «Լազարևյան ակումբի» նիստի հետ, որին մասնակցել էին նաև Արցախի ներկայացուցիչներ: Ադրբեջանի դիրքորոշումը հասցվել է Ռուսաստանի դեսպան Սերգեյ Բրատչիկովին: Մասնավորապես, դեսպանին ընդունել է Ադրբեջանի արտգործնախարար Էլմար Մամեդյարովը, որը դժգոհություն է հայտնել Մոսկվայում մարտի 5-6-ը տեղի ունեցած «Լազարևյան ակումբի» նիստին Արցախի ներկայացուցիչների և Ռուսաստանի պաշտոնատար անձանց մասնակցության կապակցությամբ: «Նման փաստերը հակասում են երկկողմ հարաբերությունների նորմատիվ-իրավական բազային և ՌԴ միջնորդական դերին»,- ասվում է Ադրբեջանի ԱԳՆ հաղորդագրության մեջ: Նաև նշվում է, որ նիստին մասնակցել է Ռուսաստանի նախագահի խորհրդական Սերգեյ Գլազևը, որը մասնակիցներին է փոխանցել նախագահի ողջույնի խոսքերը, ինչպես նաև Ռուսաստանի պետդումայի՝ ԱՊՀ, եվրասիական ինտեգրման և հայրենակիցների հետ կապերի հարցերով կոմիտեի առաջին փոխնախագահ Կոնստանտին Զատուլինը: Հաղորդագրության մեջ նշվում է, որ վերը նշված նիստին ՌԴ պետական մարմինների բարձրաստիճան պաշտոնատար անձանց մասնակցությունը «անօրինական ռեժիմի ներկայացուցիչների կողքին» կոպտորեն խախտում է ԵԱՀԿ ՄԽ համանախագահ-երկրի պարտավորությունները: «Հերթական անգամ կոչ ենք անում ռուսական կողմին կատարել իր պարտավորությունները երկկողմ հարաբերությունների շրջանակում, մասնավորապես հարգել Ադրբեջանի և Ռուսաստանի միջև 1997թ. կնքված Բարեկամության, համագործակցության և փոխադարձ անվտանգության մասին պայմանագրի դրույթները, որով «կողմերը պարտավորվում են չաջակցել անջատողական շարժումներին, ինչպես նաև արգելում և կանխում են առանձին անձանց գործունեությունը՝ ուղղված մյուս երկրի պետական ինքնիշխանությանը, անկախությանը և տարածքային ամբողջականությանը»,- ասվում է ԱԳՆ մեկնաբանության մեջ: Բայց սա ամենը չէ... Ադրբեջանի ԱԳ նախարար Էլմար Մամեդյարովն էլ իր հերթին է Ռուսաստանի դեսպան Միխայիլ Բոչարնիկովի հետ հանդիպմանը մտահոգություն հայտնել Մոսկվայում կայացած հայ-ռուսական «Լազարյան ակումբի» նիստում Արցախի ներկայացուցիչների մասնակցության շուրջ: Մամեդյարովն, ընդունելով ռուս դեսպանին, դժգոհել է, որ Ադրբեջանի և Ռուսաստանի միջև գոյություն ունեցող հարաբերությունները ռազմավարական բնույթ են կրում: Մամեդյարովն ասել է, որ ՌԴ պաշտոնական անձանց մասնակցությունը «Լազարյան ակումբի» հերթական նիստում, որն անցկացվել է Ղարաբաղի ներկայացուցիչների մասնակցությամբ, հանգեցրել է ադրբեջանական կողմի բողոքին: Վերջինս շեշտել է նաև, որ նման իրադարձությունները հակասում են ռուս-ադրբեջանական հարաբերություններին և ԵԱՀԿ Մինսկի խմբի համանախագահների դերին հայ-ադրբեջանական ղարաբաղյան հակամարտության կարգավորման գործընթացում: Նկատենք, որ մարտի 5-6-ն անցկացված «Լազարյան ակումբի» նիստում ներկա եղել Արցախի էկոնոմիկայի և արտադրական ենթակառուցվածքների նախարար Լևոն Գրիգորյանը: Հիշեցնենք, որ «Լազարյան ակումբի» նիստում Արցախի ներկայացուցիչների մասնակցությանը նախօրեին անդրադարձել է նաև ՌԴ Պետդումայի ԱՊՀ հարցերով հանձնաժողովի նախագահի առաջին տեղակալ Կոնստանտին Զատուլինը՝ նշելով, որ Հայաստանի ճակատագիրը հնարավոր չէ տարանջատել Ղարաբաղից: Բաքուն, այսպիսով, Մոսկվայից բացատրություն է պահանջում: Իրականում «Լազարևյան ակումբի» նիստի աշխատանքներին արցախցիների մասնակցությունը, իսկապես, Ալիևը կարող է դիտարկել որպես դավաճանական քայլ ՌԴ իշխանությունների ներկայացուցիչների կողմից: Բայց հանուն ճշմարտության պետք է նկատել, որ Մոսկվան կարողանում է այս հարցում «բալանս» պահել... Ռուսները մեկ «Խոջալուի» օրվա միջոցառման են մասնակցում, մեկ Մոսկվա են հրավիրում արցախցիների: Սա լրիվ ռուսական քաղաքականություն է... Եթե Ադրբեջանին այսին զինատեսակներն են վաճառվում, դրան ի հակակշիռ այլ զինատեսակներ էլ Հայաստանին են վաճառում: Արդեն տասնամյակներ Մոսկվան Երևանի ու Բաքվի արանքում մանևրում է: Թամար Բագրատունի