Երևանի քաղաքապետարանի մուտքի մոտ Niva-ով բարձրացած քաղաքացին տեղափոխվել է հոգեբուժարան

Երեւանի քաղաքապետարանի գլխավոր մուտքի մոտ մարտի 8-ին, «Նիվայով» բարձրացած 36-ամյա քաղաքացին, ով՝ ի նշան բողոքի, փորձել է ավտոմեքենան վառել, տեղափոխվել է հոգեբուժարանի: Shamshyan.com-ի փոխանցմամբ, ոստիկանությունում նյութեր են նախապատրաստվում երեկ՝ մարտի 8-ին, Երեւանի քաղաքապետարանի մոտ տեղի ունեցած միջադեպի փաստերով: Ոստիկանության կենտրոնական բաժնի ծառայողները դեպքի վայրից ոստիկանության կենտրոնական բաժին էին տեղափոխել Երեւան քաղաքի Նոր Նորքի 9-րդ փողոցի բնակիչ՝ 36-ամյա Ռոմիկ Ջ.-ին։ Վերջինս իր վարած ВАЗ 2121 մակնիշի 55 QD 553 համարանիշի ավտոմեքենայով, ըստ հետաքննության, կոպիտ կերպով խախտել էր հասարակական կարգը, բացահայտ ցինիզմ եւ անհարգալից վերաբերմունք դրսեւորել հասարակության նկատմամբ, ավտոմեքենայով բարձրացել էր Արգիշտի փողոցի 1 հասցեում գտնվող Երեւանի քաղաքպետարանի վարչական շենքի գլխավոր մուտքի դիմաց եւ ցանկացել այրել ավտոմեքենան։ Քաղաքապետարանի անվտանգությունն իրականացնող ոստիկանության ծառայողների ճիշտ եւ օպերատիվ գործողությունների արդյունքում հետագա գործողությունները կանխվել էին։ Աղբյուրի տեղեկություններով՝ պատճառը եղել է Երեւանի քաղաքապետ Հայկ Մարությանի կողմից փողոցային առեւտրի արգելքը, ինչի համար էլ Ռոմիկ Ջ.-ն անհամաձայնություն է ցուցաբերել եւ փորձել է նման եղանակով իր բողոքի ակցիան անել։ Աղբյուրի տեղեկություններով՝ նա տեղափոխվել է ՀՀ առողջապահության նախարարության «Ավան» հոգեբուժական կենտրոն։