Ինչ պլան ունի Փաշինյանը Մուկուչյանի մասով

Ազգային ժողովում Կենտրոնական ընտրական հանձնաժողովի հաշվետվությունը դեկտեմբերի 9-ի արտահերթ խորհրդարանական ընտրությունների վերաբերյալ քննարկվեց հետաքրքրական մթնոլորտում: Իշխանություն-ընդդիմություն փոխադարձ կսմիթների մթնոլորտում, այլեւ իշխանություն-Տիգրան Մուկուչյան նուրբ ակնարկներով: Հեղափոխությունից հետո ի հեճուկս անցյալում արված հայտարարությունների, որ Մուկուչյանը հզոր նկարիչ է ու ընտրությունից ընտրություն ցուցադրում է նկարչական տաղանդը, Փաշինյանը օրակարգ չբարձրացրեց նրա փոփոխության հարցը, ըստ էություն , որպեսզի ընտրություններին օգտվի Մուկուչյանի ծառայությունից: Եւ, ահա, Մուկուչյանը իր հաշվետվություն-հաղորդումը ներկայացնելիս մեծ հաշվով իրականացրեց նոր իշխանությունների գովքը՝ փաստելով, որ առաջին ընտրությունն էր, որի արդյունքները որեւէ ուժ չի վիճարկել: Սակայն Փաշինյանի թիմակիցների տրամադրություններից պարզ դարձավ, որ նրանք չեն պատրաստվում պահել Մուկուչյանին, ինչպես կասեն <<մավրը արել է իր գործը ու պետք է հեռանա>>: Օրինակ երիտասարդ պատգամավոր Սոնա Ղազարյանը նկատեց, որ ընտրողների փաստացի թիվը չի արտացոլում իրականությունը ու հենց այդ պատճառով է, որ որոշ քաղաքական ուժեր վիճարկեցին ընտրությունների մասնակցության ցածր ցուցանիշը: Պատգամավորն, ըստ ամենայնի,մեղադրեց Մուկուչյանին ընտրացուցակն ուռճացնելու մեջ, որի արդյունքը բացասաբար անդրադարձավ իրենց իշխանության վարկանիշի վրա: Մեկ ուրիշ պատգամավոր ,կրկին Իմ Քայլը խմբակցությունից Արուսյակ Ջուլհակյան անուն-ազգանունով, հարց տալուց առաջ նախ փաստեց, թե վատ օրենսգրքով, բայց քաղաքական կամքով իրենց հաջողվեց լավ ընտրություններ անցկացնել, այդուհանդերձ, պատգամավորի դիտարկմամբ՝ ընտրությունները չեն անցել առանց խախտումնեի, որը պայմանավորված է հանձնաժողովի անդամների ոչ կոմպետենտությամբ: Ջուլհակյանը ԿԸՀ-ի դեմ սլաքներն ուղղեց ոչ պատշաճ ատեստավորում անցկացնելու հարցում: Ամենադիտարժան ռաունդը սակայն Իմ Քայլից Սարգիս Խանդանյանի հետ էր, նա ԿԸՀ նախագահին հարցն ուղղելիս հայտարարեց, որ Հայաստանում 2018-ի դեկտեմբերի 9-ի ընտրություններից առաջ, նախորդ բոլոր ընտրություններն ուղեկցվել են կեղծիքներով ու Սահմանադրության լուրջ խախտումներով։«Դուք 2011 թվականից զբաղեցրել եք ԿԸՀ նախագահի պաշտոնը և զբաղվել եք ընտրությունների կազմակերպման գործընթացով։ Ինձ հետաքրքրում է՝ տեխնիկապես ավելի բարդ է կազմակերպել ընտրություններ, որոնց արդյուքնները նախապես հայտնի են և ուղեկցվում են խախտումներով, թե ավելի բարդ էր կազմակերպել վերջին ընտրությունները, որի արդյունքները չվիճարկվեցին», - Մուկուչյանի վերջնականապես ստորացրեց Խանդանյանը։Մուկուչյանի պատասխանը այլեւս կարեւոր չէր, թեպետ նա մի կերպ փորձեց տակից դուրս գալ, թե Հայաստանում ցանկացած տեսակի ընտրությունների կազմակերպման ընթացքում երբևէ դրանց արդյունքները նախապես հայտնի չեն եղել: «Ընտրությունների արդյունքները նյութականացվում են ընտրողների քվեների միջոցով՝ քվեարկությունից հետո», - ասաց նա։ ԿԸՀ նախագահի խոսքով՝ 2012-ից սկսած բոլոր համապետական ընտրությունների ժամանակ Կենտրոնական ընտրական հանձնաժողովը փորձել է հետամուտ լինել պահպանել Ընտրական օրենսգրքի պահանջները։ Այդուհանդերձ, պատգամավորը հստակեցրեց հարցը. «Դուք իսկապե՞ս պնդում եք, որ մինչև 2017 թվականը տեղի ունեցած բոլոր ընտրությունները արտահայտել են ՀՀ քաղաքացիների կամքը ընտրությունների միջոցով»։ «Ամբողջ խնդիրը հետևյալն է՝ երբ քվեատուփերից դուրս են գալիս քվեաթերթիկները ու իրականացվում է քվեարկության արդյունքների ամփոփում, ըստ էության, արձանագրության թվերը հենց այդ քվեաթերթիկներով տված քվեներն են, որոնք գտնվում էին քվեատուփերում։ Այդ գործընթացը եղել է թափանցիկ, այդ ամբողջ պրոցեսին հետևել են թե վստահված անձինք, թե դիտորդներ, թե լրատվամիջոցներ։ Այսինքն՝ գոնե 2012 թվից այս կողմ այնպես չի եղել, որ քվեատուփից հանվեն քվեաթերթիկներ ու արտացոլեն այլ պատկեր ու այլ կերպ արձանագրվեն արձանագրություններում։ Մինչ այդ, հնարավո՞ր է, որ ընտրողի կամքի վրա ներգործության դեպքեր տեղի ունեցած լինեն, իհարկե, հնարավոր են», - հավելեց Տիգրան Մուկուչյանը։ Այս քննարկումից հետո կարելի է չկասկածել, որ Փաշինյանն այլեւս չի պատրաստվում պահել Մուկուչյանին ու շուտով նրանից ազատվելու հարցն առաջ կգա:Կամ էլ Մուկուչյանին պահելով իր պաշտոնում, Փաշինյանը այսպիսով ընդամենը նրան իր մասին է հիշեցնում ու պահում վերահսկողության ներքո: Անի Սահակյան