Եթե թուղթ չկա` ի՞նչ էիք քննարկում քանի ամիս

Ղարաբաղյան կարգավորման հարցով բանակցություններ որևէ փաստաթղթի շուրջ ներկայումս չեն վարվում, Հանրային հեռուստաընկերությանը տված հարցազրույցում ասել է ՀՀ ԱԳ նախարար Զոհրաբ Մնացականյանը: «Մենք առիթ ունեցել ենք բազմիցս բացատրելու, արտահայտելու, որ մայիսից ի վեր մենք որևէ պահ չենք հապաղել, չենք հետաձգել խաղաղ գործընթացը: Արդեն անմիջապես մայիսից հետո` հունիս ամսին, մենք ունեցանք առաջին շփումները համանախագահների հետ (նոր կառավարությունը): Հունիսին եղավ առաջին հանդիպումը ԱԳ նախարարների մակարդակով: Հուլիսին չկայացավ հանդիպում բրյուսելյան համաժողովի շրջանակներում: Սեպտեմբերին եղավ երկրորդ հանդիպումն արտգործնախարարների: Սեպտեմբերին եղավ շատ հստակ արդյունքով շփում վարչապետի և Ադրբեջանի նախագահի միջև: Եղավ հանդիպում հետագայում նաև Սանկտ Պետերբուրգ, հետո հունվարին եղավ հանդիպում արտգործնախարարների նորից, և (վարչապետի ու Ադրբեջանի նախագահի) շփումը Դավոսում», - նշել է Զ.Մնացականյանը: Նրա խոսքով, սա նպատակ է ունեցել մեզ համար հստակ ներգրավվելու գործընթացի մեջ և հստակեցնելու այն մոտեցումները, որ այս Կառավարությունն ունի խաղաղ գործընթացի համար: «Սա է եղել տրամաբանությունը մինչև հիմա և շարունակում է մնալ, որովհետև մենք նպատակաուղղված աշխատելու ենք բացարձակապես խաղաղ կարգավորման ուղղությամբ: Խաղաղությանն այլընտրանքը պետք է բացառել: Դա, նորից եմ կրկնում, չի նշանակում, որ բացակայում է վճռականություն հայկական որևէ կողմից: Բայց մենք նպատակաուղղված աշխատելու ենք խաղաղ կարգավորման ուղղությամբ», - հայտարարել է Մնացականյանը: Տպավորություն է ստեղծվում, որ հայկական կողմը հետ է կանգնում նախկինում տված խոստումներից, կամ պայմանավորվածություններից: Իհարկե, չի կարելի պնդել, որ Փաշինյանի թավշյա հեղափոխությունից հետո գոյություն է ունեցել կոնկրետ կարգավորման տարբերակ: Սակայն որոշակի պայմանավորվածություններ, համաձայնություններ, ըստ ամենայնի եղել են, կամ գուցե՝ դեռ մինչև հիմա էլ կան, սակայն հայկական կողմը, հաշվի առնելով երկրի ներսում բավական ուժգին քննադատությունը՝ որոշեց հետ քայլ անել: Ավելին, այժմ էլ, պաշտոնական Երևանը, կարծես, սկսել է էլ ավելի խստացնել դիրքորոշումը: Օրերս ինչպես հայտնի է ԱԱԾ ղեկավարն էր Արցախում, նրա հայտարարությանը ջղաձիգ արձագանքեցին Ադրբեջանից, երբ նա նշեց, որ՝ «մենք հստակ ուղերձ ենք տալու ողջ հայ ժողովրդին և ողջ աշխարհին, որ մենք ոչ մի թիզ հող հետ հանձնելու նպատակ չունենք, այլ ընդհակառակը, մեր հողերում պետք է բնակվեն մեր հայրենակիցները և շենացնեն մեր երկիրը»: Նա կրկին հանդես է եկել պարզաբանմամբ: Հայաստանի և Արցախի անվտանգության մակարդակը ժամանակի որևէ պահին չի կարող նվազել, այն ամեն օր միայն պետք է աճի, այս մասին Արցախ կատարած այցի վերաբերյալ «Արմենպրես»-ի հարցմանն ի պատասխան ասել է ՀՀ ազգային անվտանգության ծառայության տնօրեն Արթուր Վանեցյանը: «Ես պրոֆեսիոնալ սպա եմ և իմ գործն անվտանգության ապահովելն է, և թույլ չտալը որևէ ոտնձգություն Հայաստանի և Արցախի անվտանգության համակարգի նկատմամբ: Սա հատկապես կարևոր է այն պայմաններում, երբ հարևան երկրից ամենաբարձր մակարդակներով գրեթե ամեն օր հիմնահարցի ռազմական ճանապարհով լուծման, ուժի և ուժի սպառնալիքի կիրառման հայտարարություններ են հնչում։ Բնականաբար, մեր անվտանգության համակարգը պետք է պատրաստ լինի արձագանքելու այս սպառնալիքներին։ Հայաստանի և Արցախի անվտանգության մակարդակը ժամանակի որևէ պահին չի կարող նվազել, այն ամեն օր միայն պետք է աճի և սրան են ուղղված մեր ջանքերը»: Եթե Մնացականյանը վստահեցնում է, որ որևէ փաստաթղթի շուրջ բանակցություններ չեն ընթանում, ապա հարց է ծագում, իսկ ինչ են քննարկել Հայաստանի և Ադրբեջանի արտգործնախարարները մի քանի հանդիպումներում, մի քանի ժամանոց հանդիպումներում: Ժամանակն է, որպեսզի հայկական կողմը, վերջապես, անկեղծ տեղեկացնի, թե հատկապես ինչ է ներկայացրել Ադրբեջանի հետ բանակցություններում, ինչ նոր մոտեցումներ, այլապես անընդհատ բախվելու ենք հարցականների շարքի ու արդարացումների՝ իշխանությունների կողմից: Թամար Բագրատունի