ՀՀ-ում չի լինելու որևէ լուրջ քաղաքական գործընթաց, որը չանցնի Մելիք Ադամյանի մոտով․ Շարմազանով

Հայաստանի հանրապետական կուսակցությունում դեռ չգիտեն՝ մասնակցելու են Ընտրական օրենսգրքի բարեփոխումների վերաբերյալ առաջարկություններին, թե ոչ: Այս մասին «Ա1+»-ի հետ զրույցում հայտնել է ՀՀԿ խոսնակ Էդուարդ Շարմազանովը: «Բնականաբար ՀՀԿ-ն ցանկացած քաղաքական գործընթացում իր ծանրակշիռ կարծիքը կարտահայտի, երբ որ կգա ժամանակը, մենք մեր կարծիքը կարտահայտենք, մեր առաջարկությունները կանենք: Հայաստանում չի լինելու որևէ լուրջ քաղաքական գործընթաց, որը չանցնի Մելիք Ադամյանի մոտով»: «Ամեն ինչ կախված է, թե ինչպիսի քննարկումներ կգնան, ինչ ծավալի, եթե հերթական անգամ օդում կրակելը պիտի լինի պտիչկա դնելու համար, ես չեմ կարող դրան պատասխանել: Եթե պետք է լուրջ քննարկումներ լինի, ՀՀԿ-ն որպես Հայաստանում առանցքային քաղաքական ուժ, առանցքային և իր պատմությամբ, և այսօր՝ ներկա կարգավիճակով, որովհետև ինչքան էլ մարդիկ ջանան աջ ու ձախ ասել հանրապետականը կա՞, չկա՞, Փաշինյանի կազմակերպած խայտառակ, ատելության մթնոլորտում իրականացված ընտրություններում ՀՀԿ-ն 4-րդ տեղն է զբաղեցրել, երբ որ բոլորը ՀՀԿ-ին քարկոծում էին ու ասում, որ 0% է հավաքելու»: