Լոզունգների ժամանակն ավարտվեց. Փաշինյանը շտապում է

Եվրամիության հետ Համապարփակ և ընդլայնված գործընկերության համաձայնագրի իրականացումը հսկայական նշանակություն ունի բարեփոխումների հաջողությունների համար, երեկ հայտարարել է վարչապետ Նիկոլ Փաշինյանը՝ ելույթ ունենալով ԵԽ արտաքին հարաբերությունների հանձնաժողովում։ Նա հստակ ասել, է, որ բարեփոխումների քաղաքականության իրականացման ընթացքում Հայաստանը հանդիպում է մի շարք խոչընդոտների: «Այս առումով պարզ է մի բան. Եվրամիության հետ Համապարփակ և ընդլայնված գործընկերության համաձայնագրի (CEPA) իրականացումը հսկայական նշանակություն ունի մեր բարեփոխումների հաջողությունների համար: Այս նախաձեռնության արժեքը և գրավչությունը ի հայտ կգան բացառապես բարեփոխումների իրականացման միջոցով: CEPA-ն բարեփոխիչ գործիք է: Դրա դրույթների իրագործումը կհանգեցնի մեր հասարակության բազմաթիվ ոլորտներում որակական փոփոխությունների: Հայաստանի կառավարությունը վճռական է CEPA-ի իրագործման համար անհրաժեշտ բոլոր միջոցները ձեռնարկելու հարցում: Եվրամիության ֆինանսական և տեխնիկական օժանդակությունը մեզ համար չափազանց կարևոր է: Մենք ձեր աջակցության կարիքն ունենք` բարեփոխումների իրականացման ուղղությամբ կտրուկ քայլեր կատարելու համար: Ակնհայտ է, որ Եվրամիության ընդլայնված աջակցությունը կօգնի մեզ առաջ շարժվել ավելի վճռականորեն: Որքան ավելի մեծ լինի օգնության ծավալը, այնքան ավելի արագ և հարթ կընթանան մեր բարեփոխումները», ասել է Փաշինյանը: Այլ կերպ ասած՝ Բրյուսելում Փաշինյանը հստակ ԵՄ-ից ավելի մեծ աջակցություն է խնդրել՝ իրականացվելիք բարեփոխումների համար: Բրյուսելում կայացած հանդիպումից հետո Նիկոլ Փաշինյանը և Դոնալդ Տուսկը հանդես են եկել ԶԼՄ-ների համար հայտարարությամբ: Տուսկի հետ հանդիպմանն էլ Փաշինյանը նշել է, որ նոր Հայաստանը պատրաստ է շարունակական ջանքեր գործադրել, նոր գաղափարներ ու նախաձեռնություններ առաջարկել՝ Եվրոպական միության և նրա անդամ պետությունների հետ համագործակցությունը հարստացնելու ուղղությամբ. «Մենք մտադիր ենք իրականացնել այս հավակնոտ օրակարգը` հիմնվելով մեր քաղաքացիների և հայրենակիցների ծանրակշիռ մանդատի, ինչպես նաև մեր միջազգային գործընկերների հարաճուն աջակցության վրա»: Իր հերթին ԵԽ նախագահ Դոնալդ Տուսկը վստահեցրել է, որ ԵՄ-ն կշարունակի աջակցել Հայաստանին ավելի համախմբված ժողովրդավարություն դառնալու և իր քաղաքացիներին ավելի լավ տնտեսական ապագա ստեղծելու ճանապարհին: «Այս համաձայնագիրն իրականացվում է ներքին բարեփոխումներին զուգընթաց: ԵՄ-ն պատրաստ է շարունակել աջակցել ձեր բարեփոխումների գործընթացին՝ ընդլայնված տեխնիկական և ֆինանսական օժանդակությամբ: Մենք համաձայն ենք կոռուպցիայի դեմ պայքարում և օրենքի գերակայությանն ուղղված բարեփոխումների գործընթացում ձեր ուժեղ շեշտադրման հետ: Հատկանշական է, որ Տուսկը դրական նոտաներով մտքերից հետո թեթև անցում է կատարել նաև ԼՂ հակամարտության կարգավորմանը ու նկատել է, որ բանակցային գործընթացը հույս է ներշնչում. «Հույս է ներշնչում վերջին շրջանում բանակցային գործընթացը և երկու կողմերի շփումները: Եվրամիությունը շարունակում է հավատացած մնալ, որ այս ստատուս-քվոյի պահպանումը երկար չի կարող շարունակվել և անհրաժեշտ է քաղաքական լուծում գտնել միջազգային օրենքի տառին համապատասխան»: ԵՄ-ի աջակցության ակնկալիքը փաստում է այն մասին, որ Հայաստանում բարեփոխումներ իրականացնելու ճանապարհին մեծ անելիք կա, կարելի է ասել, առանձնապես ոչինչ էլ չի արվել: Մյուս կողմից Փաշինյանն իր խնդրանքով ի ցույց է դնում Հայաստանի, ոչ այնքան բարվոք տնտեսական իրավիճակում գտնվելը: Այսինքն, հեղափոխությունից գրեթե մեկ տարի անց, խոշոր հաշվով, երկրի զարգացման ճանապարհին՝ բարեփոխումների տեսանկյունից, դեռ հիմնական անելիքը մնում է: Նիկոլ Փաշինյանը, թերևս, շտապում է, գիտակցելով, որ այլևս երկար ժամանակ հասարակության սնել լոզունգներով հնարավոր չէ, նրան հարկավոր են առարկայական արդյունքներ: Թամար Բագրատունի