Հայկ Ալումյանը՝ ԲՀՀ կազմակերպությունից ստացած դրամաշնորհի մասին

Փաստաբան Հայկ Ալումյանը ֆեյսբուքյան իր էջում գրել է. Հարգելի փաստաբաններ և այլ իրավապաշտպաններ: Նկատի ունենալով, որ երեկ <<բացահայտվեց>>, որ ես Բաց հասարակության հիմնադրամներ (ԲՀՀ) կազմակերպությունից դրամաշնորհներ եմ ստացել, կուզեի որոշակի պարզություն մտցնել այդ հարցում: 10 տարուց ավել է, ինչ <<Ռազմավարական դատավարություն>> ծրագրի շրջանակներում ԲՀՀ-ն ֆինանսավորում է այն գործերով իրավաբանական օգնությունը, որոնցով. (1) Առկա է Մարդու իրավունքների խախտում, (2) Առկա է իրական հնարավորություն հասնելու այդ իրավունքի վերականգնմանը և (3) Այդ գործով հաջողությունը կարող է դառնալ նախադեպ՝ նմանօրինակ կրկնվող խախտումները հետագայում բացառելու կամ նվազեցնելու համար: Այդ ծրագրին մասնակցելու և դրամաշնորհ ստանալու համար փաստաբանը (նաև այլ իրավապաշտպանները և իրավապաշտպանության ոլորտում գործող ՀԿ-ները) պետք է լրացնեն հայտ, որի ձևը կա ԲՀՀ-ում: Հայտում անհրաժեշտ է ցույց տալ, որ տվյալ գործը համապատասխանում է վերը նշված չափանիշներին, ինչպես նաև՝ նկարագրել, թե ինչ գործողություններ եք պատրաստվում անել տվյալ գործով: Ցանկալի է նշել նաև այն գումարը, որ ձեզ անհրաժեշտ է՝ գործը վարելու համար, ներառյալ ձեր վարձատրության չափը: ՊԵՏՔ Է ՆՇԵՄ, որ ԲՀՀ-ն ակտիվորեն տարածում էր այս ծրագրի մասին տեղեկատվությունը, ավելին, մեկ կամ երկու անգամ կլոր սեղաններ է անցկացրել, որպեսզի փաստաբաններին ու այլ իրավապաշտպանների ներկայացնի այս ծրագրի առավելությունները ու դիմելու ձևը: Ես ինքս համարյա բոլոր իմ փորձնակներին հորդորել եմ իրենց փաստաբանական գործունեության ընթացքում դիմել այս ծրագրին (թեկուզ վստահ չեմ, որ գոնե մեկը դիմել է):  Օգտվելով առիթից կրկին հորդորում եմ՝ բաց մի թողեք հնարավորությունը, դիմեք այդ ծրագրով դրամաշնորհ ստանալու համար: Ասեմ, որ իմ մի շարք գործերով պարզապես հնարավորություն չէի ունենա մասնակցելու և հաջոդության հասնելու, եթե չլիներ ԲՀՀ-ի ֆինանսական աջակցությունը: