« Արմեն Բիլյանը փորձել է կրակել վրաս, Պավել Մանուկյանը թույլ չի տվել». ոստիկան

«Գիշերը, երբ Վլադիմիր Նիկողոսյանի հետ իմ մեքենայով մոտեցանք ՊՊԾ գնդին, մոտավորապես 10-15 մետրի վրա նկատեցինք «ԿՌԱԶ» մակնիշի մեքենան, որը հարվածել էր դարպասին: Ադ ընթացքում նկատեցինք մի տարեց մարդու՝ սպիտակ մորուքով, որն ավտոմատները դրած դեպի մեր ուղղությամբ կրակում էր, բայց օդ էր գնում»,այսօր ցուցմունք է տվել և պատմել «Սասնա ծռեր»-ի 10 անդամների գործով տուժող, ՊՊԾ գնդում 7 օր պատանդ մնացած ոստիկան Գարիկ Մաթևոսյանը,ով դեպքի օրը ծառայություն է իրականացրել Խորենացի փողոցում: «Զինված խմբի անդամները ցանկանում էին իմ  և ոստիկաններից Դավիթի մեքենաներն այրել:  Ես էլ Պավել Մանուկյանին ասացի` մի վնասեք մեր մեքենաները, թողեք դրանք տանենք ավտոպարկ: Մենք ի՞նչ մեղք ունենք, որ ձեր գործողությունների պատճառով պետք է վնաս կրենք»,- պատմել է տուժողը: Իվերջո  կարողացե՞լ են մեքենաները դուրս հանել գնդից, Մաթևոսյանը պատասխանել է` այո: Մեղադրողի հարցին՝ նրա նկատմամբ բռնություն գործադրվե՞լ է գնդի ներսում, Մաթևոսյանը պատասխանել է՝ ոչ. «Եղել է դեպք, որ Արմեն Բիլյանը փորձել է կրակել վրաս, Պավել Մանուկյանը թույլ չի տվել»,- ասել է նա: Գարիկ Մաթևոսյանը նույնպես առարկել է, որ այս գործով ամբաստանյալներին համաներում շնորհվի:   Հաջորդ նիստը տեղի կունենա մարտի 13-ին։