«Քասթինգի» հանձնաժողովի կազմը գաղտնի է

Հրապարակը գրում է. Կադրային բանկ ձեւավորելու համար վարչապետի կարգադրությամբ ձեւավորված հանձնաժողովի կազմը, Նիկոլ Փաշինյանի որոշմամբ, գաղտնի է պահվում։ Երեկ այս մասին մեր լրագրողին ասել է «քասթինգի» հանձնաժողովում ընդգրկված «Իմ քայլը» խմբակցության պատգամավոր Արեն Մկրտչյանը։ Նա գաղտնիության որոշումը բացատրել է կոռուպցիոն ռիսկերը կանխելու հիմնավորմամբ, որպեսզի հանձնաժողովականներին չզանգեն տարբեր տեղերից ու չբարեխոսեն ծանոթ-բարեկամների համար։ Փաստորեն, կարծում են, որ ոմանք գայթակղություններին չեն դիմանա։ Մենք մի քանի հրապարակում ենք արել այս «քասթինգի» մասին․ մասնակիցներից մեկը բողոքել էր, որ քննություն վերցնողներն ավելի թույլ գիտելիքներ ունեին, քան մասնակիցները։ Մկրտչյանից հետաքրքրվեցինք՝ կա՞ն որոշակի չափորոշիչներ, որոնց պետք է համապատասխանեն  «քննիչները»։ «Ես  չգիտեմ՝ ինչ չափորոշիչներով է ձեւավորվել հանձնաժողովը, այն վարչապետն է ձեւավորել, եւ պետք է իրենից հարցնեք, բայց չեմ կարծում, որ վարչապետի ձեւավորած կազմում կլինեն ոչ պրոֆեսիոնալներ, այլ բան, որ միգուցե ներկայանա առանձին ոլորտի նեղ մասնագետ, եւ հանձնաժողովի անդամներից որեւէ մեկը չլինի տվյալ ոլորտի նեղ մասնագետ»։ Այդ դեպքում ինչպե՞ս եք որոշելու՝ համապատասխանո՞ւմ է ենթադրյալ պաշտոնին, թե՞ ոչ։ «Ես  չգիտեմ, հանձնաժողովի անդամները կպատասխանեն, իսկ Ձեր պնդումները հաստատելով՝ ես ակամայից կհաստատեմ հանձնաժողովի կազմը»։