«Պա՞րզ է, թե ո՞վ է իսկական թիրախը». Արա Պապյան

Դիվանագետ Արա Պապյանը ֆեյսբուքյան իր էջում գրել է. «Այ հիմա պարզ դարձավ թե ինչու՞ էր պետք Հախվերդյանի ասած աննշան ու անկարևոր խոսքը այդքան ուռճացնել: Պա՞րզ է, թե ո՞վ է իսկական թիրախը: Հիմա մնաց պարզել՝ դա ինքնուրո՞ւյն խաղ է, թե ԿԳԲ-ի՞ պատվերն է»: Նա նման գրառում է արել` անդրադառնալով ՛՛ Միջազգային մարդասիրական հիմնադրամ՛՛-ի գլխավոր տնօրեն՝ Անդրանիկ Նիկողոսյանի այն հայտարարությանը, թե Ռուբեն Հախվերդյանի ասածը վարչապետի՝ Արցախի հարցում, ընտրած քաղաքականության շարունակությունն է: Ներկայացնում ենք նրա խոսքից մեկ հատված. «Այո, լսել եմ ու հազարավոր իսկական հայերի պես ես ևս վրդովված եմ: Հիմա մի պարզ ճշմարտություն կասեմ. Հախվերդյանի պես մտածող մարդիկ միշտ էլ եղել են, բոլոր ժամանակներում: Հայաստանում ապրող ցանկացած ղարաբաղցի, այսպես թե այնպես, զգացել է այդ բացասական , ՛՛ջոկողական՛՛ վերաբերմունքն իր նկատմաբ: Գուցե դա պայմանավորված է եղել իշխող ղեկավարության որտեղացի լինելուց՝ չգիտեմ, չեմ կարող ասել, բայց այն, որ այս մոտեցումը միշտ էլ եղել է՝ դա հաստատ է: ՈՒրիշ բան է, որ հիմա շատերն են սկսել դա բարձրաձայն արտահայտել, և դա շատ վտանգավոր, ազգակործան իրականության սկիզբ է... Կարծում եմ պատճառը ՀՀ Վարչապետի հայտարարությունն էր այն մասին, թե ինքը արցախցիների մանդատը չի ստացել, ուստի չի կարող նրանց անունից բանակցել: Այդ միտքը հաստատեց նաև ՀՀ Արտգործնախարարը՝ Հ1 հեռուստաընկերությանը տված իր հարցազրուցում: Շատերը նկատեցին, որ Արտգործնախարարի արտահայտած մտքերից լրագրողները կարկամել էին. զգացվում էր, թե որքան հարցեր ունեին այդ առթիվ տալու, բայց դե.... Ասածս այն է, որ եթե պետական մակարդակով Վարչապետը նման միտք է արտահայտում, բնական է, որ պնակալեզ հախվերդյաններն էլ պիտի այսպես արտահայտվեն: Ստացվում է, որ Հախվերդյանի ասածը Վարչապետի՝ Արցախի հարցում, ընտրած քաղաքականության շարունակությունն է, ու եթե այսօր պետական մակարդակով նրա արտահայտած մտքերը քննադատման չենթարկվեն, վաղը այդպիսի հազարավոր հախվերդյաններ կհայտնվեն, ովքեր կմտածեն, թե ղարաբաղցիների մասին վատ արտահայտվելով՝ հաճոյանում են իշխանություններին: Ես իհարկե, չեմ կարծում, որ նման կարծիք ու դիրքորոշում ունեն ՀՀ իշխանությունները, բայց իմ կարծելը քիչ է, կան փաստեր, որոնք սարսափելի են»: