«Քաղաքական, տնտեսական, հանրային դիսկուրսն իջել է «պլինտուսի» մակարդակի». Արմեն Աշոտյան

«Եթե պետք է գնանք այսպիսի տրամաբանությամբ, ես կառաջարկեմ օրինագծի հեղինակներին Լևոն Տեր-Պետրոսյանի հրաժարականի օրը սահմանել որպես Արցախի փրկության օր»,- մարտի 4-ին մամուլի ասուլիսի ժամանակ ասաց ՀՀԿ փոխնախագահ Արմեն Աշոտյանը՝ անդրադառնալով ապրիլի 23-ը Քաղաքացու օր հռչակելու վերաբերյալ տեղեկությանը: Աշոտյանի խոսքով՝ այս ամենը ցույց է տալիս հասարակական-քաղաքական-պետական մտքի սնանկությունը: «Քաղաքական, տնտեսական, հանրային դիսկուրսն իջել է «плинтус»-ի մակարդակի»,- ասաց նա: Նա, որպես օրինակ հիշեց Ֆրանսիական մեծ հեղափոխության ժամանակ սահմանված հեղափոխական օրացույցի մասին. «Ֆրանսիայում մեծ հեղափոխությունից հետո սահմանվեց օրացույց, որտեղ օրինակ պատմությունը սկսվում էր 1792 թվականի սեպտեմբերի 22-ից, երբ հանրապետություն հռչակվեց։ Ամեն ամսին տվեցին հեղափոխական անունները, տարվա ամեն մի օր ուներ իր անունը։ Այս օրացույցը վերացրեց Նապոլեոն, երբ դարձավ կայսր»։ ՀՀԿ փոխխոսնակի համոզմամբ՝ սա ցույց է տալիս պետական մտքի սնանկությունը. «Իհարկե այս ամենը ծիծաղելի կլիներ, եթե այսքան ողբերգական չլիներ։ Սա ցույց է տալիս պետական մտքի սնանկությունը»։