Փաշինյանի ահն ու Օսիպյանի «դուխը»

Ոստիկանապետ Վալերի Օսիպյանն իշխանական պատգամավորների հետ ունեցած փակ հանդիպումից հետո մի շարք ուշագրավ հայտարարություններ է արել: Հատկանշական է Մարտի 1-ին ոստիկանության եւ անձամբ իր մասնակցության վերաբերյալ Օսիպյանի պատասխանները: Մարտի 1-ի քաղաքացիական երթին ոստիկանությունը մասնակցություն ունենալո՞ւ է հարցին, նա պատասխանել է. <<Իհարկե: Մենք դա դիտարկում ենք որպես հավաք, և ոստիկանությունը ցանկացած հավաքի և երթի ընթացքում ապահովում է հասարակական անվտանգությունը>>: Բացի հասարակական կարգի ապահովումը, ոստիկանության մյուս ստորաբաժանումները կմասնակցե՞ն այս երթին որպես քաղաքացիներ.<< Դա յուրաքանչյուր քաղաքացու, յուրաքանչյուր ոստիկանի գործն է: Բայց որ իմ կողմից հանձնարարական լինի, որ գան, մասնակցեն՝ ոչ: Մնացած մասով մենք ծառայությունը կկազմակերպենք>>,- ասել է ՀՀ ոստիկանապետը: Բայց ահա, անձամբ իր մասնակցության հարցին ի պատասխան նա չի բացառել՝ ասելով.<<Կախված է ինչ-ինչ հանգամանքներից>>: Հետաքրքիր է իմանալ այդ ինչ հանգամանքներ պետք է լինեն, որպեսզի ոստիկանապետն անձամբ մասնակցի Մարտի 1-ի տարելիցին նվիրված երթին; Եթե նախկինում Օսիպյանի՝ նման միջոցառումներին անձամբ մասնակցությունը որպես կանոն լինում էր հատուկ նպատակներով, քանի որ նա ընդդիմադիրների ցույցերն ու երթերը <<ցրելու>> անգերազանցելի շնորհով էր օժտված, ապա ներկայումս ոստիկանապետի այդ ունակությունները այլեւս առոչինչ են, քանի որ այս երթի կազմակերպիչն անձամբ Նիկոլ Փաշինյանն է: Հետեւաբար Օսիպյանի մասնակցությունը երթին կարող է ունենալ միայն մեկ բացատրություն՝ զորակցություն Փաշինյանին ու իր քաղաքական թիմին: Հետեւաբար այդ հանգամանքը, որի մասին խոսում է Օսիպյանը կարող է լինել միայն Փաշինյանի հրահանգը: Գուցե սրա է համար է, որ Օսիպյանը հստակ ու կատեգորիկ չի հայտարարում, որ Ոստիկանությունը ապաքաղաքական մարմին լինելու փաստով պայմանավորված ինքն իրավունք չունի մասնակցելու նման երթերի, ոստիկանության աշխատակիցները կզբաղվեն հասարակական կարգի պահպանմամբ, բայց իր ներկայությունն ինքնին կխորհրդանշի ոստիկանության զորակցությունը օրվա իշխանություններին: Այսինքն քանի դեռ Նիկոլ Փաշինյանից հրահանգ չի ստացել, ոստիկանապետն այդքան դուխ չունի կոնկրետ հայտարարություններ անելու։ Ոչ պակաս ուշագրավ էր նաեւ Սաշիկ Սարգսյանի որդու վերաբերյալ Օսիպյանի հայտարարությունները: Եթե խորհրդարանական ընտրություններից առաջ ոստիկանապետը հպարտ քաղաքացիներին խոստանում էր Հայաստան վերադարձնել Ֆրանկլին Գոնսալեսի անվան տակ արտերկիր գնացած Նարեկ Սարգսյանին, ապա այսօր նահանջում է այդ հայտարարություններից.<< Դա արդեն ոստիկանության գործառույթներից չի կախված: Այս հարցում ինչ հնարավոր է, ոստիկանությունն արել է>> ասում է Օսիպյանը, հարցին՝ բացառո՞ւմ եք, որ Նարեկ Սարգսյանը չարտահանձվի Հայաստան.<< Չեմ կարող ասել: Դա ոստիկանությունից կախված չի, դրա համար չեմ կարող ասել>>: Փոխարենը ՀՀ հեղափոխական ոստիկանությունը հույժ կարեւոր գործերով է զբաղվում, ինչպիսին ասֆալտին փռելն է ու պատերին ծեփելը: Ոսիպյանն էլ պարծենում է, որ վերջերս էլ են մեկին ասֆալտին փռել, թե ում, չի ասում, ավելին Օսիպյանը բացահայտ ասում է, որ գործընթացն այդ <<եղել է կա ու կլինի>> Անի Սահակյան