«Ճահիճ» բառը հուզել է ԵՊՀ ռեկտորին

Դավիթ Գյուրջինյանը ֆեյսբուքյն իր էջում գրել է. «Երևանի պետական համալսարանի հոգաբարձուների խորհրդի նիստում (2019 թ. փետրվարի 28) ելույթիս ժամանակ ասել եմ, որ համատարած ճահիճ է ոչ միայն պետական համալսարանում, այլև մյուս համալսարաններում, որ համալսարանական կյանքը մեռած է երկրում (տե՛ս հղման 1.19.22) և այլն: «Ճահիճ» բառը հուզել է ԵՊՀ ռեկտոր Ա. Սիմոնյանին, և նա, իմ անունը չտալով, արդեն երկրորդ անգամ ասում է, որ «ճահիճ» բառը գործածողը համալսարանն ընդհանրապես չգիտի, իրականում պետհամալսարանը մեծ առաջընթաց է գրանցել և այլն (հղումներից մեկը՝ մեկնաբանության մեջ, 8.51): Ուզում եմ մի երկու պարզաբանում տալ: Հոգաբարձուների խորհրդի նիստին հետևողն անշուշտ լսեց, որ ԵՊՀ պետության և իրավունքի տեսության ու պատմության ամբիոնի վարիչ Ա. Վաղարշյանն ինձնից առաջ ասաց՝ «էս 30 տարի ճահճացած հանրապետության մեջ պահանջում են, որ էդ միջավայրում համալսարանը լիներ բարգավաճող», իսկ հետո՝ «հիմա մենք ռեկտորին անվստահություն ենք հայտնում, որովհետև մեր ճահիճ պետության մեջ համալսարանը չի բարգավաճում»... (տե՛ս հղման 41.01): Այս գնահատականը, որ վերաբերում է Հայաստանի Հանրապետությանը և անմիջականորեն առնչվում է իշխանությունից հեռացված ՀՀԿ-ին, որն իսկապես ճահճի է վերածել ողջ երկիրը, կարծեք չի հուզում հանրապետական կուսակցության անդամ ռեկտորին:  Իրականությունը լղոզելը, փաստերը շրջանցելը պատմաբան ռեկտորին վայել չէ... Այս վարքագիծը հենց ճահճի վկայություն է: Եկել է ճահիճը չորացնելու ժամանակը: Ոչ միայն ԵՊՀ-ում»: