Մարտի 1-ի դեպքերը ցավ են ողջ ժողովրդի համար. ԲՀԿ-ականները ծաղիկներ դրեցին Մարտի1-ի զոհերի հիշատակին

«Բարգավաճ Հայաստան» կուսակցության անդամները կուսակցության նախագահ Գագիկ Ծառուկյանի գլխավորությամբ քայլերթով այցելեցին Մյասնիկյանի արձանի տարածք, ծաղիկներ դրեցին Մարտի 1-ի զոհերի հիշատակին։ Գագիկ Ծառուկյանը լրագրողների հետ զրույցում նշեց, որ Մարտի 1-ի դեպքերը ցավ են ողջ ժողովրդի համար: Հարցին` մասնակցելո՞ւ են այսօր իշխանության կազմակերպած երթին, Ծառուկյանը պատասխանեց. «Տեսնենք, եթե հարմար լինի, կարող է մասնակցենք, բայց հիմա մենք եկել ենք հարգանքի տուրք մատուցելու, ոնց որ միշտ ենք արել»: Ծառուկյանը նշեց, որ ինքը մարտի 1-ի դեպքերի առնչությամբ չի հարցաքննվել: «Ինչո՞ւ պետք է հարցաքննվեմ, ես այդ դեպքի հետ բացարձակ կապ չունեմ, 100 անգամ բացատրել եմ դա: Ծառուկյանը մաքուր է»,- ասաց նա: Հարցին էլ` 2008 թվականի կոալիցիայի մեջ է ԲՀԿ-ն եղել, պատասխանատվություն չեք զգում, Ծառուկյանն արձագանքեց. «Մեր ձեռն ի՞նչ կար, որ մենք պատասխանատվություն զգանք»: Անդրադառնալով դիտարկմանը, որ կողմ են քվեարկել արտակարգ իրավիճակ մտցնելու համար, ԲՀԿ-ական պատգամավոր Նաիրա Զոհրաբյանն արձագանքեց, որ արտակարգ իրավիճակի քվեարկություն չի եղել: