Ժողովուրդ ջան, մենք չենք փորձում խաղալ մարդկանց ճակատագրերի հետ. նախարար

ՀՀ տարածքային կառավարման և զարգացման նախարար Սուրեն Պապիկյանի և ԱԺ «Իմ քայլը» խմբակցության պատգամավորների փակ հանդիպումից հետո նախարարը  լրագրողներին տեղեկացրեց, որ հիմնականում քննարկել են նախարարության խնդիրներն ու ծրագրերը։ «Առաջիկայում կարևոր անելիքը տարածքային կառավարման մասին օրենքն ԱԺ բերելն է, որից կբխի նաև մարզպետարանների աշխատակազմերի կրճատումը։Խոսքը աշխատակազմերի մոտ 30% կրճատումների մասին է»,- ասաց նա՝ ընդգծելով, որ արդյունքում կառավարումն առավել օպտիմալ կդառնա։ «Ժողովուրդ ջան, մենք չենք փորձում խաղալ մարդկանց ճակատագրերի հետ, մենք չենք ուզում մարդկանց դարձնել աշխատազուրկ, մենք ուզում ենք կառավարումը դարձնել արդյունավետ, դրա համար հնարավորություն պիտի ունենան պետական կառավարման համակարգում աշխատեն մասնագետները, որոնք պրոֆեսիոնալ են, ոչ թե նրա համար, որ ինչ-որ փուլում ունեցել են խնամի-ծանոթ-բարեկամ և հարմարավետ տեղավորվել են»,- նշեց Ս.Պապիկյանը։ Նա հավելեց, որ ամենաշատ կրճատումները կլինեն Գեղարքունիքի մարզում, իսկ նոր համակարգում մարզպետարաններում կլինեն մեկական փոխմարզպետներ։