Պլստալու գինը

Վարչապետի տիկին Աննա Հակոբյանի «City of smile» (Ժպիտների քաղաք) բարեգործական հիմնադրամի նվիրատուների ցանկից պարզ է դառնում, որ ամենամեծ գումարը նվիրաբերել է «Զանգեզուրի պղնձամոլիբդենային կոմբինատ» ՓԲԸ-ն՝ 51 մլն դրամ՝ ավելի քան հարյուր հազար դոլար: Կոմբինատի ՓԲԸ խորհրդի անդամ, Սյունիքի նախկին մարզպետ Վահե Հակոբյանը Factor.am-ի հետ զրույցում ասել է, թե բարեգործական հիմնադրամին փոխանցված 51 մլն դրամն այդքան էլ մեծ թիվ չէ.«Կոմբինատի սոցիալական պարտավորությունների շրջանակներում ընդհանրապես խոշոր չի համարվում: 2019 թվականի բյուջեում մենք բարեգործության համար նախատեսել ենք 15 միլիոն դոլար կամ 7 միլիարդ 300 մլն դրամ: Այսինքն`50 մլն դրամը, կներեք, բայց ես չեմ համարում, որ խոշոր գումար է»: Հակոբյանն ասել է, թե նախկինում ևս ԶՊՄԿ-ի կողմից մեծ չափերի բարեգործություններ են կատարվել: Հիշեցնենք, որ ինչպես Աննա Հակոբյանի նշյալ հիմնադրամն է հավաքված գումարը տրամադրում քաղցկեղով հիվանդ երեխաների բուժմանը, այնպես էլ նախկին առաջին տիկին Ռիտա Սարգսյանի բարեգործական՝ Նվիրիր կյանք հիմնադրամն էր: Վահե Հակոբյանը վստահեցրել է, որ իրենք նաեւ տիկին Ռիտայի հիմնադրամին են գումար փոխանցել. «Մեզ համար միևնույն է, թե ով ինչ հիմնադրամ է ղեկավարում: Մենք փոխանցել ենք նախկին իշխանությունների ժամանակ, փոխանցում ենք հիմա և կփոխանցենք մյուս իշխանությունների ժամանակ: Հիշեցնենք, որ անցած տարի վարչապետի հանձնարարականով սեպտեմբեր ամսվանից ստուգումներ էին սկսվել Զանգեզուրի պղնձամոլիբդենային կոմբինատում: Այստեղ ստուգումներն ավարտվել էին այս տարվա հունվարի 21-ին, բայց որևէ լուրջ խախտում չհայտնաբերվեց: Հնարավո՞ր է, որ, եթե Զանգեզուրի պղնձամոլիբդենային կոմբինատը 51 մլն դրամ չփոխանցեր վարչապետի տիկնոջ հիմնադրամին, ստուգումների արդյունքում «հետաքրքիր դեպքեր» բացահայտվեին , հարցին Հակոբյանը պատասխանել է. «Ստուգումները կավարտվեր այնպես, ինչպես որ հիմա ավարտվել է: Ե՛վ հարկային մասով, և՛ բնապահպանական: Այսինքն՝ Դուք ակնարկում եք, որ ես ասեմ՝ մենք գումար ենք տվել դրա դիմա՞ց, դա հիմարություն է»: Իհարկե, Վահե Հակոբյանի ամեն ինչ կարող է ասել, սակայն առնվազն հիմար է պետ լինել, հավատալու համար իր խոսքերին: Մի պարզագույն փաստ, ՀՀ պետական եկամուտների կոմիտեի հրապարակած 2018 թվականի հազար խոշոր հարկատուների ցանկից արդեն ակնհայտ է դառնում, որ Զանգեզուրի պղնձամոլիբդենային կոմբինատը նախկինում հարկեր է թաքցրել, բայց թե ինչպես ստուգումների արդյունքում դա չեն հայտնաբերել, կարելի է կռահել: Այսպիսով՝ 2017-ին խոշոր հարկատուների ցանկում հինգերորդ հորիզոնականը զբաղեցնող կոմբինատը 2018-ին բարձրացել է երկրորդ տեղ, 2018-ին վճարել է 41 մլրդ դրամի հարկ, սակայն նախորդ՝ 2017թ․-ին, վճարել էր ընդամենը 18,7 մլրդ դրամի հարկ։ Այսինքն՝ նրա հարկերը 2018-ին կրկնակիից ավելի աճել են: Իսկ ինչու է այս ամենը անտեսվել, կարծում ենք շատ պարզ, որովհետեւ Վահե Հակոբյանը մուծվել է վարչապետի տիկնոջ հիմնադրամին: Ինչ վերաբերում է Վահե Հակոբյանի այն հայտարարությանը, թե դա առանձնապես մեծ գումար չէ, անշուշտ, մենք նույնպես կարծում ենք, որ մարզպետ աշխատած տարիներին Երեւանից Սյունիք ուղղաթիռով գնացող մարդու համար, դա կարող է անգամ թեյավճար էլ լինել, Վահե Հակոբյանի եւ նրա ընտանիքի ունեցվածքը, առհասարակ, գլխապտույտ է առաջացնում, սակայն մենք առաջարկում ենք պարոն Հակոբյանին առնվազն ամիսը մեկ անգամ նման ոչ խոշոր գումարով աջակցել սոցիալապես անապահով ընտանիքներին: Անի Սահակյան