Կեղծիք է, քանի որ «Մարտի 1»-ը բացահայտված չէ.Զարուհի Փոստանջյան

«Մենք պետք է հասկանանք, որ այդ ողբերգական իրադարձությունը, որը տեղի է ունեցել մեր պատմության մեջ, չի կարող լուծվել միայն երթերով ու հանրահավաքով։ Իսկ լուծումն այն պետք է լինի, որ Մարտի 1-ին տրվեն և′ իրավական, և′ քաղաքական գնահատականներ, մինչդեռ մինչև այս պահը նման գնահատականներ չունենք։ Բացի այդ, եթե մենք երթ ենք անում, և այն ուղևորվելու է դեպի Մյասնիկյանի արձանի մոտ, ապա ո՞ւր է մարտի 1-ի զոհերին նվիրված հուշարձանը։ Որովհետև, եթե ցանկանում են, որ մեր հասարակության մեջ իրապես տեղի ունենան փոփոխություններ, ապա պետք է դրա վերաբերյալ լինի հուշարձան»,- Հայելի ակումբում լրագրողների հետ հանդիպմանը նշեց  «Երկիր ծիրանի» կուսակցության նախագահ  Զարուհի Փոստանջյանն անդրադառնալով մարտի 1-ի երթին, հավելելով,  որ այն քաղաքացիների իրավունքն է՝ երթերի, հավաքների միջոցով արտահայտել իրենց ազատ իրավունքները։ «Եթե մարտի 1-ի զոհերին նվիրված հուշարձան չկա, ապա միայն երթ անել և «բոլորի ողբերգությունն օգտագործել քաղաքական նպատակների համար՝ անթույլատրելի է»։Ես  տեսնում եմ, որ նման միջոցառումները ծառայում են ոչ թե իրենց բուն նպատակին, այլ այդ անվան տակ սպասարկում են նեղ քաղաքական նպատակների՝ նեղ խմբակի կողմից։ Այս պարագայում մենք ունենք շուրջ 10-ամսյա կառավարություն, որի առաջնորդը հռչակել էր, որ պետք է բացահայտի «Մարտի 1»-ը, բացի այդ՝ Հանրապետության հրապարակում բարձրաձայնեց, որ «Մարտի 1»-ը բացահայտված է, ցավում եմ, որ նրա այս հայտարարությունը, ցանկությունը, նպատակը կեղծիք է, քանի որ «Մարտի 1»-ը բացահայտված չէ»,- եզրափակեց Զարուհի Փոստանջյանը։