«Սամվել Ալեքսանյանը «ջրի» գնով խոզի միս է լցրել շուկան»

«Ագրարագյուղացիական միավորում» հ/կ ղեկավար Հրաչ Բերբերյանն այսօր լրագրողների հետ զրույցում ասել է, որ միայն վերջին մեկ տարվա ընթացքում Հայաստանում 67 հազարով կրճատվել է մանր եղջերավոր անասունների քանակը, որից 30 հազարը կթու կովեր են, 10-12 հազարով կրճատվել է նաև խոզի գլխաքանակը: Հ. Բերբերյանի խոսքով՝ դրա պատճառն այն է, որ Սամվել Ալեքսանյանը «ջրի» գնով խոզի միս է լցրել շուկան։ «Ես չեմ ասում՝  շուկան փակեք, ասում եմ՝ հայ արտադրողների արտադրանքը խթանեք, սուբսիդավորեք։ Երբ Հնդկաստանից գոմեշի միս էին բերում, հանրության մեջ մի խավ կար, որ այդ էժան միսն էր գնում»,- նշեց նա։ Նրա համար դեռևս հարց է, թե ինչու մինչև այսօր պետությունը գյուղացուն չի սուբսիդավորում, փոխարենը՝ սուբսիդավորում է բանկերին, որոնք թալանում են գյուղացուն։ «Երբ ժամանակին հարց բարձրացրեցի, որ պետք է պայքարեն մորմազգի ցեցի դեմ, Գյուղատնտեսության նախկին նախարարը մեզ պատասխանեց, որ այդ պայքարով կվնասեն ընտանի կենդանիներին և մարդկանց, նախարարի այդ պատախանը պահել եմ, որ թանգարան տանեմ։ Նա բնագավառից կիլոմետրով հեռու էր կանգնած, կարող է՝ «կռուշկայով» կոնյակ լցնել գիտի, բայց բնագավառից հեռու էր»,- ընդգծեց Հ. Բերբերյանը։