Նախարարը երևի փոքր ժամանակից կարտոֆիլ չէր սիրել, կարտոֆիլի փոխարեն գարի ներկրեց. Հրաչ Բերբերյան

«Ագրարագյուղացիական միավորում» հ/կ ղեկավար Հրաչ Բերբերյանի կարծիքով այսօր ցանկանում են փակել նախարարությունը, ինչ է թե՝ ցույց չտան, որ վերջին 10 տարում 64 մլրդ է ծախսվել: Նրա խոսքով` «ջայլամային» քաղաքականության արդյունք է այն, որ բելառուսական կարտոֆիլ է հայտնվել հայկական շուկայում, ավելին՝ 2014 թվականին 56 հազար տոննա կարտոֆիլ է արտահանվել Հայաստանից, իսկ չորս տարի անց հասել են նրան, որ արդեն Հայաստանն է ներկրում։ «Ես չեմ ասում՝  շուկան փակեք, ասում եմ՝ հայ արտադրողների արտադրանքը խթանեք, սուբսիդավորեք։  Երկու տարի առաջ Գյուղատնտեսության նախարարի հետ գնացինք նախկին վարչապետ Կարեն Կարապետյանի հետ հանդիպման, որպեսզի նա գյուղացիներին աջակցեր և տրամադրեր կարտոֆիլի սերմեր՝ սերմաթարմացում իրականացնելու համար։ Կարեն Կարապետյանը հանձնարարեց, որ 200 տոննա էլիտար սերմացու ներկրեն Հայաստան։ Բայց քանի որ Գյուղատնտեսության նախկին նախարարը, որը երևի փոքր ժամանակից կարտոֆիլ չէր սիրել, կարտոֆիլի փոխարեն գարի ներկրեց, որը մնաց պահեստներում, մկները կերան, ու որևէ մեկը չդատվեց, որի արդյունքում էլ տեղի ունեցավ բերքի անկում։ Որ ասում են՝ ժողովրդի ուղեղը պետք է արթնանա, ուզում եմ ասել՝ դուք ձեր ուղեղներն արթնացրեք, հետո ժողովրդի ուղեղներն արթնացնելու մասին խոսեք»,- նշեց նա։