Արայիկ Հարությունյանը հրաժարական կտա, եթե...

Վաղը ԵՊՀ-ում հոգաբարձուների խորհուրդը քննարկելու է ռեկտորի պաշտոնանկության հարցը: Նշենք, որ անցած շաբաթ ոստիկանությունը հայտնեց ԵՊՀ-ում հայտնաբերված չարաշահումների մասին, իսկ ռեկտոր Արամ Սիմոնյանը պնդեց, թե իշխանությունների կողմից քաղաքական հետպանդման է ենթարկվում: ՀՀ կրթության և գիտության նախարար Արայիկ Հարությունյանը, անդրադառնալով քաղաքական ճնշումներին, ասաց, որ նման բան չի կարող լինել: «Այն օրը, երբ կապացուցվի, որ որևէ ոստիկանական կամ ԱԱԾ-ական ճնշում եղել է հոգաբարձուների խորհրդի անդամի վրա, ես հրաժարական կտամ: Ես գիտեմ, որ նման բան չկա, անգամ 1 տոկոսանոց ապացույց չունեմ, որ նման ճնշում կա»,- ասաց Հարությունյանը: Նախարարն անհիմն համարեց այն հայտարարությունները, թե ԵՊՀ ռեկտոր Արամ Սիմոնյանի նկատմամբ քաղաքական ճնշում է գործադրվում, քանի որ իրենց ռեկտորին են ցանկանում նշանակել, իսկ Արամ Սիմոնյանը ՀՀԿ խորհրդի անդամ է. «Նման բան բացառվում է, ու մինչև հիմա Արամ Սիմոնյանի հետ եղել են բացառապես գործընկերային հարաբերություններ, ինքն է փորձում այս ամենը քաղաքականացնել՝ ներքաշելով նաև իր գործընկերներին պրոցեսի մեջ։ Ես պարզապես իր գործընկերներին կոչ կանեմ այս սադրանքներին չտրվել։ ԵՊՀ-ում երկար ժամանակ աշխատել եմ, այնտեղ և՛ գիտխորհրդում, և՛ մնացած բոլոր ֆակուլտետներում կան հոյակապ մասնագետներ։ Իմ նշանակվելուց հետո Արամ Սիմոնյանին և մնացած բոլոր ռեկտորներին հավասար ու արդար վերաբերմունք եմ ցուցաբերել ու ցուցաբերելու եմ։ Մեր նախարարության ամենաբարձր պաշտոններին կան մարդիկ, որոնք Արամ Սիմոնյանի կուսակիցներն են»: