Դա խաղ է կրակի հետ. քաղաքապետարանը մեզ պարտք է. Մերուժան Տեր-Գուլանյան

Մամուլի հետ չի կարելի վերնագրերի լեզվով խոսել, դա խաղ է կրակի հետ։ Այս մասին այսօր Հայելի ակումբում ասաց «Անդին» գրական գեղարվեստական, հասարակական-քաղաքական ամսագրի խմբագրական խորհրդի նախագահ, գրող, հրապարակախոս Մերուժան Տեր-Գուլանյանը՝ անդրադառնալով հնգօրյա ժամկետում Բուզանդի հասցեում գտնող տարածքը ազատելու մի շարք լրատվամիջոցներին ուղղված քաղաքապետարանի ծանուցմանը։ Ինչպես նշեց` Բյուզանդի 1/3 շենքը գեղեցիկ է միայն դրսից, իսկ ներսից քստմնելի ու անհասկանալի մի կառույց է։ Ավելին՝ տարիներ առաջ, երբ զբաղեցրել են իրենց հատկացված տարածքները, դրանք իսկական ավերակ են եղել, տարիների ընթացքում կարողացել են կարգի բերել ու աշխատել։ «Մենք տարածք չենք ստացել, այլ ստացել ենք հողամաս, հսկայական փող ծախսեցինք, որ աշխատատեղ դառնա: Ամեն հարկում կան «Ֆանտաստիկ» զուգարաններ, որոնք  Խորհրդային շրջանի հոտը լավ պահել են, բայց մենք դրանք  սանհանգույց սարքեցինք: Նախկին քաղաքապետերը՝ տեսնելով, թե որքան գումար ենք ծախսել, որոշեցին, որ տարածքն անհատույց ժամանակով տրամադրեն մեզ: Կարծում եմ, որ քաղաքապետարանը մեզ պարտք է, այս մեռյալ շենքը կենդանանում է մեզանով: Այս շենք գալիս մարդիկ, մտավորականներ, գրողներ, նկարիչներ գալիս են այս խմբագրությունների համար»,- շեշտեց Մերուժան Տեր-Գուլանյանը։ Նա քաղաքապետարանին հորդորեց մամուլի հետ այդ տոնով չխոսել. «Դա խաղ է կրակի հետ։ Այն որոշումը, որն ուղարկել են մեզ, չափազանց անհարգալից վերաբերմունք է մամուլի նկատմամբ։ Երբեք մամուլի հանդեպ այսպիսի վերաբերմունք չեմ տեսել, ինչպես այս վերջնագրում։ Չի կարելի մամուլի հետ վերջնագրի լեզվով խոսել։ Մամուլի հետ պետք է հարգանքով լինել։ Թող գան տեսնեն ինչից ինչի է վերածվել այս շենք»։