Ռուսաստանը ձգտում է կնքահայր կարգվել ղարաբաղյան ճակատում
Ադրբեջանի արտգործնախարարության մամուլի ծառայության ղեկավար Լեյլա Աբդուլաևան տեղեկացրել է Հայաստանի Հանրապետության վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպման ուղղությամբ տարվող նախապատրաստական աշխատանքների մասին, հայտնում է minval.az-ը: «Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի հանդիպման կազմակերպման ուղղությամբ աշխատանքները շարունակվում են»,-ասել է նա: ԱԳՆ ներկայացուցիչն ընդգծել է, որ կայանալիք հանդիպման ամսաթվի վերաբերյալ առայժմ ստույգ տեղեկություն չկա: Ռուսաստանյան «Նեզավիսիմայա գազետա» պարբերականը, անդրադառնալով Լեռնային Ղարաբաղի հակամարտության խաղաղ կարգավորման բանակցային գործընթացում տեղի ունեցող վերջին զարգացումներին՝ ԵԱՀԿ Մինսկի խմբի համանախագահների` տարածաշրջան կատարած այցին, ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի՝ Դուշանբեում, Սանկտ Պետերբուրգում, Դավոսում ունեցած հանդիպումներին, հրապարակել է «Հայաստանն ու Ադրբեջանը «համեստ» քայլեր են անում դեպի խաղաղություն» վերտառությամբ հոդված: Պարբերականի սյունակագիր Յուրի Ռոքսը նկատում է, որ հակամարտության կարգավորման հարցում որոշակի դրական փոփոխություններ, այնուամենայնիվ, կան: «Փաշինյանի և Ալիևի՝ Դուշանբեի, Սանկտ Պետերբուրգի և Դավոսի հանդիպումներից հետո շփման գծում լարվածությունն էականորեն թուլացել է: Հանդիպումների ընթացքում հակամարտության խաղաղ լուծմանը ժողովուրդներին նախապատրաստելու և երկու ազգերի միջև վստահության մակարդակի բարձրացմանը նպաստելու վերաբերյալ պայմանավորվածություն է ձեռք բերվել: Սակայն ամենակարևորն այն է, որ կողմերը, հավանաբար, հակված են ուժերի և հնարավորությունների սահմաններում հետևելու իրենց խոստումներին»,-գրում է Ռոքսը: Պարբերականի Բաքվի աղբյուրները, իրենց հերթին, հայտնել են, որ տեղի իշխանությունները զգալի նվազեցրել են Հայաստանի հասցեին ռազմատենչ հռետորաբանությունը, ինչպես նաև հակահայկական ուղղվածության հեռուստահաղորդումների ու հրապարակումների քանակը: «Կտրուկ փոփոխությունների մասին չեմ խոսի, սակայն փոփոխությունները կարող է չզգալ միայն կույրն ու խուլը»,- «Նեզավիսիմայա գազետա»-ի հետ զրույցում ասել է ադրբեջանական աղբյուրը: Ռուսական մամուլի լավատեսությունն իհարկե, հօդս է ցնդեցնում օրերս ՀՀ նախագահի խորհրդական Թևան Պողոսյանի ֆեյսբուքյան գրառումն այն մասին, թե Ադրբեջանն ինչ ինժեներական աշխատանքներ է ծավալում շփման գծում: Սակայն, ըստ երևույթին, Մոսկվան, ցանկանում է տիրանալ ղարաբաղյան «կառուցողական» մթնոլորտին՝ որպես դրա «կնքահայր»: Պատահական չէ, որ Լավրովը մի առիթով հայտարարեց, որ Հայաստանից են քայլ սպասում: Այնպես, որ, թեև Փաշինյան-Ալիև հանդիպման կազմակերպման մասին առայժմ որոշակիություն չկա, ամեն դեպքում Մոսկվան կարծես, ձգտում է պահպանել ազդեցությունը բանակցող կողմերի վրա, և ցանկալի է՝ բանակցային գործընթացի շարունակականության ֆոնին: Մետաքսյա Շալունց
Հետևեք մեզ Viber-ում
