Հայրիկյանը գիտի` որն է լինելու Հայաստանի նոր հիմնը

Հայաստանի հիմներգը փոխվելու է: Այս մասին ասել է ԱԻՄ ղեկավար Պարույր Հայրիկյանը` նշելով, որ գիտի, թե որն է լինելու Հայաստանի նոր օրհներգը, սակայն հիմա չի հայտնի այն։ Հայրիկյանն ասաց, որ իր գրած երկու տեքստերը թեկնածու են եղել նոր հիմներգի համար, սակայն ինքը դեմ է, որ դրանցից որևէ մեկը փոխարինի Միքայել Նալբանդյանի տարբերակին։ Հայրիկյանը պնդում է, որ քառատողերում փոփոխություններ պետք է արվեն, մասնավորապես «ազատ, անկախ»-ի փոխարեն դնել «վերածնված» և այլն։ Նրա համոզմամբ` խորհրդային Հայաստանի՝ Արամ Խաչատրյանի կողմից գրած հիմնը սովետական կառավարիչների պատվերով գրած երգ է, և այն պետք է դիտարկել ամենավերջին հերթին՝ հայության շրջանում եղած բոլոր, տասնյակ հազարավոր երգերը դիտարկելուց հետո, ինչպես նաև՝ հիմնը պետք է ազգի հետ ճանապարհ անցած լինի։