«Կառավարության կարևորագույն խնդիրը». Արտաշես Փափազյան
«Ներդաշնակ աշխարհ» ֆոնդի համանախագահ Արտաշես Փափազյանը ֆեյսբուքյան իր էջում գրել է. «Ջրամբարները կկառուցվեն, եթե… Ճշմարիտ է, որ աղքատությունն առաջին հերթին մեր ուղեղներում է պետք հաղթահարել: Վստահ եմ, որ խոսքը լոկ չքավորներին, թշվառներին ու ընչազուրկներին չի ուղղված, այլ՝ բոլորին: Աղքատություն ասվածն էլ, առաջին հերթին, մեր հոգևոր ունայնությանն ու մեր գաղափարական ոչնչությանը, մեր՝ միայն անձնապաշտության ու նյութապաշտության, խաբեբաության ու ձրիակերության, ցոփության ու շվայտության աշխարհներում թափառող մտքերին ու անզուսպ ցանկություններին է վերաբերում: Այսօր, եթե մենք, իրոք, առաջընթացի ենք ձգտում, ավելի քան երբևէ, կարիք ունենք փոխելու մեր մտածելակերպը, վերանայելու նախկինում որպես առաջնային հայտարարված և մեր մտածողության բոլոր ոլորտներն զբաղեցրած եսակենտրոն, նյութապաշտական գաղափարները, գաղափարներ, որոնք բոլորիս անխտիր, վերածել են միայն սպառմամբ ու կյանքի վայելքներով հետաքրքրված, միայն բամբասանքներով ու բանսարկություններով հրապուրված, ոչինչ տալով առավելագույնը վերցնելու մոլուցքով տարված անդեմ ու միաչափ արարածների: Դժբախտաբար, մեր գիտակից մտավորականները, իրենց՝ ազգիս գաղափարական էլիտա համարողներն անգամ չեն տեսնում արժեհամակարգային փոփոխությունների իրականացման անհրաժեշտությունը: Մեր կառավարության կարևորագույն խնդիրը, «մարդկանց մտածելակերպի փոփոխությանը» նպաստելը պիտի լինի և քանի որ (հաշվի առնելով մտածողության իներցիոնությունը) մարդիկ չեն կարողանում ինքնուրույն «վերափոխվել», ապա Կառավարության առաջնային նպատակը, այս ոլորտում ևս, թավշյա, ոչ բռնի հեղափոխություն իրականացնելը պիտի լինի: Ասվածը կենսագործելու ամենակարճ ուղին, ՊՐՈՊԱԳԱՆԴԻՍՏԱԿԱՆ լայնածավալ աշխատանք կազմակերպելն է: Դժբախտաբար, համապարփակ քարոզչության վրա, ոչ մի ուշադրություն չի դարձվում: Հակառակը, մեդիամիջոցների 90%-ը հանձնված է «հակահեղափոխականներին», որոնք այսօր, ավելի քան երբևէ, անարգել վար ու ցանք են անում ինֆորմացիոն տարածքներում, էլ ավելի խորացնելով առկա բարոյական անկումը, (գրեթե բոլոր հեռուստաալիքներով ՇԱՐՈՒՆԱԿՎՈՒՄ Է պարազիտիզմն ու բանդիտիզմը, անբանությունն ու գողականությունը, անբարոյականությունն ու մարմնապաշտությունն ուղղակի քարոզող հեռուստասերիալների ցուցադրությունը, մարդկանց, առավելապես երիտասարդության ու երեխաների դեգրադացմանն ու հիմարացմանն ուղղված տարաբնույթ հաղորդումների հեռարձակումը, հեղափոխության խորքային իմաստները ծաղրող նրա ձեռքբերումները ծանակող անմիտ ու տափակ շոուների ցուցադրությունը ), իսկ թվացյալ չեզոք համարվող մեդիամիջոցներն էլ կամ սաբոտաժ են անում, կամ ցանկության պարագայում էլ, կարծում եմ, չգիտեն, թե ինչ պետք է անել: Այս վիճակին անհապաղ հարկավոր է վերջ տալ, այլապես եղած հոգեվիճակով, երբ բոլորը փորձում են հեղափոխության արդյունքները իրենցով անել, երբ ամեն մեկը ձգտում է ոչինչ չտալով առավելագույնը պոկել (ինչի վառ օրինակն են «աջ ղեկ» և ընդհանրապես մեքենաների առք ու վաճառքով զբաղվողները, տաքսիստները, ապրանք ներկրողները, տուգանք չմուծողները, գիտնական ու մշակութային գործիչ համարվողները, կրճատումների դեմ պայքար մղող անբանները, բարմենները, մատուցողները... ԲՈԼՈՐՍ), մենք ոչ միայն ջրամբարներ, այլ առուներ անգամ չենք կարողանալու կառուցել: Մարդկանց հոգեվիճակի փոփոխությանը նպաստող գաղափարների պրոպագանդումն է Կառավարության կարևորագույն խնդիրը»:
Հետևեք մեզ Viber-ում
