Արեն Մկրտչյանը մերժել է Գևորգ Պետրոսյանի բանավեճի հրավերը

Մարդու իրավունքների և հանրային հարցերի մշտական հանձնաժողովի նիստում մերժվեց «Արհմիությունների մասին» օրենքի նախագիծը ԱԺ բերելու հարցը։ Այս մասին ֆեյսբուքյան իր էջում գրել է ՀՀ ԱԺ «Իմ քայլը» խմբակցության անդամ Արեն Մկրտչյանը: «Նիստից հետո նախագծի վերաբերյալ լրատվականներից մեկին հայտնած տեսակետից հետո նախագծի հեղինակ, ԲՀԿ-ից իմ գործընկեր Գևորգ Պետրոսյանն ինձ հրավիրել է բանավեճի։ Քանզի նիստը ամբողջությամբ լուսաբանվել է, բոլորը լսել են պրն Պետրոսյանի փաստարկները, ընդդիմախոսների, այդ թվում իմ հակափաստարկները, որոնք անփոփոխ են, թեման ինձ համար համարում եմ փակված, բանավեճի անհրաժեշտություն չեմ տեսնում»,- գրել է նա։ Արեն Մկրտչյանը Գևորգ Պետրոսյանին շնորհակալություն է հայտնել իր «տեսակետը չընդունելով այն կարևորելու և դրա արդյունքում բանավեճի հրավերի համար»։