Օսիպյանի քավորը պայթեցնելու է ՊԵԿ-ը

ՊԵԿ-ի գլխին սեւ ամպեր են կուտակվում, դեռ չմարսած պարգեւատրումների աղմկահարույց թեման, նոր սկանդալ է պայթում: Մամուլում տարածված տեղեկությունների համաձայն` ՊԵԿ նոր ղեկավարության կողմից նախկին «Նորֆոլկ քոնսալթինգից» ազատվելու նպատակը «Յունիսերվ» ՍՊԸ-ն ստեղծելն էր, որն իրականացնելու է նույն գործառույթները՝ զբաղվելով մաքսային միջնորդական ծառայությամբ: Ըստ որոշ տեղեկությունների` ընկերության հետևում կանգնած է ՊԵԿ նախագահի տեղակալ Շուշանիկ Ներսիսյանը, ում մամուլը կնքել է «Նակոլկա Շուշո» մականունով՝ ոտքին դաջվածք ունենալու պատճառով: Բնականաբար նման կառույցը չի կարող գործել առանց ՊԵԿ ղեկավար Դավիթ Անանյանի առնվազն իմացության, եթե չասենք հովանավորչությամբ: Ինքը՝ Շուշանիկ Ներսիսյանը, այսօր Ֆեյսբուքի իր էջում փորձել է հերքել տեղեկությունը. «Դատելով վերջին շրջանում իմ անձին վերագրվող տարբեր կեղծ լուրերը, որոնցից վերջինը վերաբերում է նորաստեղծ մաքսային միջնորդական կազմակերպության իրական շահառու լինելուն` կարելի է եզրակացնել, որ իմ գործունեությունը շատ մարդկանց խանգարում է։ Հետաքրքիր են նաև «որոշ» մաքսային միջնորդների շրջանակներում տարածված խուճապահար խոսակցությունները, որոնցից կարելի է փաստել, որ աշխատանքս գնում է ճիշտ ուղղությամբ։ Պաշտոնապես հայտարարում եմ, որ չունեմ առնչություն ոչ մի բրոկերական գրասենյակի հետ և պետական պաշտոն զբաղեցնելու ընթացքում չեմ զբաղվելու ոչ մի ձեռնարկատիրական գործունեությամբ։ Կոչ եմ անում համապատասխան մարմիններին անհրաժեշտության դեպքում ուսումնասիրել իմ գործունեությունը և առաջարկում եմ իմ լիակատար համագործակցությունը՝ սկսած ֆինանսական միջոցների մասին տեղեկություն տրամադրելուց, մինչև անձնական հեռախոսի տվյալների ուսումնասիրություն»: Եթե կան մարդիկ, որոնց այս անունը ոչինչ չի ասում, ապա տեղեկացնենք, որ Շուշանիկ Ներսիսյանը այդ պաշտոնում է հայտնվել Արարատ Միրզոյանի հովանավորչությամբ, նա Միրզոյանի հանրահայտ դարձած <<զոնտիկով տիկնոջ>> ՝ Գոհարի ընկերուհին է: Երիտասարդ այս աղջիկը ղեկավարում է մաքսային ոլորտը, թեպետ նրա՝ ոլորտից անտեղյակության մասին մաքսայինում լեգենդներ են հյուսվում: Նա ոչ միայն չի պատկերացնում ոլորտը, այլ աշխատանքի է տեղավորում ծանոթ-բարեկամներին: Այսինքն, իսկզբանե նրան ճանաչողները գիտեն, որ Շուշանիկը ՊԵԿ է գործուղվել հատուկ առաքելությամբ եւ դժվար է հավատալ նաեւ նրա հերքումներին: Նա նաև այն բարձրաստիճան պաշտոնյաների թվում է, ով հայտնվել է Բարձրաստիճան պաշտոնատար անձանց էթիկայի հանձնաժողովի կողմից անբարեխիղճ հայտարարարատուների թվում՝ 2018-ին պաշտոնական պարտականությունները ստանձնելու օրվա դրությամբ առկա գույքի, եկամուտների հայտարարագիր չներկայացրած պաշտոնատար անձանց ցանկում։ Իսկ հայտարարագիրը ներկայացրել է պաշտոնը զբաղեցնելուց 3 ամիս հետո միայն, երբ հանձնաժողովը բարձրաձայնեց այդ մասին: Այս պաշտոնյայի ազդեցիկությունը երեւաց նաեւ այս ժամանակ, երբ էթիկայի հանձնաժողովից ստիպված եղան սրբագրել իրենց հայտարարությունը, ասելով, թե Շուշանիկի դեպքում թյուրիմացություն է եղել: Վերադառնալով՝ «Յունիսերվ»-ին, այն զբաղվելու է մաքսային միջնորդական ծառայությամբ եւ կարող է մոնոպոլիզացնել ոլորտը։ Արդեն փակվել են «Ուրբան» մաքսային տերմինալը եւ Արարատյան մաքսատանը գործող 3-րդ ձեւակերպման բաժինը, այդ գործառույթները կիրականացվեն «Յունիսերվ»-ի միջոցով։ Ըստ տեղեկությունների՝ ՊԵԿ-ում առկա կոռուպցիոն սխամաների բացահայտման գործին է լծվել կոմիտեի օպերատիվ հետախուզության վարչության պետ Կարեն Կարապետյանը, որի գործունեությունը սակայն կասեցված է անցած տարվա ամռանից: Նա այդ պաշտոնւմ է նշանակվել հեղափոխությունից հետո՝ հունիսին եւ աշխատել է մեկ ամիս , մեկ ամսվա ընթացքում ինչպես օրերս իր փաստաբանը հայտնեց, իրականացրել է մի շարք բացահայտումներ, այդ թվում՝ կոռուպցիոն սխեմաներ, որոնք հանդիսացել են հարկային հանցագործություններ եւ զգալի վնաս են հասցրել տնտեսությանն ու բյուջեին։ Այս ամենը դուր չի եկել, այսպես կոչված, պետական պաշտոնյաներին, որի արդյունքում ՊԵԿ նախագահը ծառայողական քննություն է սկսել Օպերատիվ հետախուզության վարչության նկատմամբ, Կարեն Կարապետյանի՝ ՊԵԿ-ում աշխատանքը կասեցված է՝ նրա նկատմամբ ծառայողական քննություն է ընթանում: Կան տեղեկություններ, որ նա է պայթեցրել նաեւ պարգեւավճարների թեման եւ առաջիկայում նոր սկանդալներ են սպասվում: Անի Սահակյան