Կոռուպցիոն սկանդալ Պետական վերահսկողական ծառայությունո՞ւմ. Նոր մանրամասներ

Analitik.am- ի տեղեկություններով, ՀՀ Պետական վերահսկողական ծառայության կողմից պետական տենդերներին առնչվող գործընթացում հնարավոր կոռուպցիոն գործարքների հետ կապված ՀՀ վարչապետ Նիկոլ Փաշինյանի հանձնարարությամբ փաստերի փաթեթ է ուղարկվել ՀՀ ԱԱԾ: Մոտ 90 էջանոց փաթեթում առկա փաստերի առնչությամբ ՀՀ ԱԱԾ են հրավիրվել տենդեների հետ առնչություն ունեցող մարդիկ՝ այդ թվում «Սուրբ Գրիգոր Լուսավորիչ» ԲԿ տնօրենը, Վանաձորի բժշկական կենտրոնի տնօրենը, ինչպես նաև ՀՀ ՊՎԾ Վերահսկողական վարչության և Գնումների վարչության պետերը: Նշենք, որ վերոնշյալ վարչությունների պետերը հարազատ եղբայրներ են և նշանակվել են Դավիթ Սանասարյանի կողմից: ԱԱԾ-ին մոտ կանգնած մեր աղբյուրները փոխանցեցին, որ ՊՎԾ երկու վարչությունների պետերի՝ Ադյան եղբայրների և պետական գնումներով 30-ից ավել տենդերներ շահած «Զորաշեն» ՍՊԸ-ի հիմնադիրների կապն արդեն հաստատված է. Մոտ 90 էջանոց փաստաթղթերի մեջ կան նաև լուսանկարներ, որտեղ Ադյան եղբայրները և «Զորաշեն» ՍՊԸ-ի հիմնադիրները միասին ընտանեկան խնջույքների են մասնակցում: Նշենք, որ Ադյան եղբայրները ջնջել են իրենց անձնական էջերը բոլոր սոցցանցերից: Ըստ մեր աղբյուրի, այս պահին ԱԱԾ-ում քննություն է ընթանում հետևյալ ուղղություններով՝ պարզելու համար, թե ինչպե՞ս է ստացվել, որ հարազատ եղբայրները զբաղեցրել են Պետական վերահսկողական ծառայության երկու վարչությունների պետերի պաշտոնները , արդյոք իրենց հնարավոր հանցանք պարունակող գործողությունները կատարել են սեփական նախաձեռնությամբ, թե՝ ՀՀ ՊՎԾ պետ Դավիթ Սանասարյանի հանձնարարությամբ: Հավելենք, որ եթե քննությամբ ապացուցվի, որ Ադյան եղբայրների գործողություններում կա հանցակազմ, և նրանք գործել են Դավիթ Սանասարյանի հովանավորչությամբ, ապա գործում կներգրավվի նաև Դավիթ Սանասարյանն անձամբ, ինչքան էլ վերջինս հայտարարում է, թե ձերբակալվողի դեմք չունի: Մանրամասները՝ սկզբնաղբյուր կայքում