Ինչ ցուցմունք տվեցին «Սասնա ծռեր»-ի գործով տուժողները

Այսօր «Սասնա ծռեր» խմբի 10 անդամների գործով դատավարությանը հարցաքննվում են տուժողները, որոնք գտնվել են ՊՊԾ-ի տարածքում: Այսօր դատարանում հարցաքննվեց գործով տուժող, ավագ ոստիկան Վիգեն Մարտիրոսյանը: Նա ասաց, որ ծառայում է պետական պահպանության գլխավոր վարչության հատկապես կարևորագույն օբյեկտների և հիմնարկ ձեռնարկությունների պահպանության գնդում, պատմեց, որ դեպքի օրը՝ 2016թ․ հուլիսի 17-ին, առավոտյան ժամը 6։20-ի սահմաններում զանգահարել են իրեն եւ հայտնել, որ տագնապ է հայտարարված եւ շտապ պետք է ներկայանա ծառայության։ «Երբ հասա գնդի մոտ, նկատեցի, որ «Կռազը» հարվածել է դարպասներին, երբ մի քիչ էլ առաջացա՝ ինքնաձիգով զինված անձինք կանգնացրեցին ինձ, ինքնաձիգն ուղղեցին ինձ վրա, հարցին, թե ով է ինձ ուղարկել, զինված ես, թե ոչ, ստուգեցին գրապաններս, վերցրին հեռախոսս, ասացին, որ մտնեմ հսկիչ անցագրային կետի հանգստյան սենյակ։ Այնտեղ տեսա Վարդան Եղիազարյանին եւ Վալերի Օսիպյանին, մյուս ոստիկաններին, որից հետո հրաձգություն տեղի ունեցավ, հետո Օսիպյանը եկավ ու ասաց, որ հրաձգության հետեւանքով ոստիկաններ են վիրավորել: Հետո ասացին, որ իրավապահների հետ բանակցություն է տեղի ունեցել եւ մեկին պետք է բաց թողնեն ու ինձ ասացին, որ դու դուրս ես գալիս»,- պատմեց տուժողը: Վերջինս ասաց, որ ՊՊԾ գնդի տարածքում գտնվել է մոտ երեք ժամ: Վիգեն Մարտիրոսյանը դատարանում հայտարարեց, որ ինքն իրեն տուժող է ճանաչում, քանի որ ենթարկվել է հոգեբանական ճնշման: Պաշտպան Զարուհի Փոստանջյանի հարցին, թե ի՞նչ է հասկանում հոգեբանական ճնշում ասելով, տուժողը չկարողացավ հստակեցնել: «Երբ որ ինքնաձիգով ինչ-որ մեկը հսկում է, որ դու մի սենյակից դուրս չգաս, դրանից վախ եմ զգացել: Ամբողջ իրավիճակը վախ ներշնչող էր, երբ ես ներս եմ մտել, հրաձգություն էլ է եղել, դրանից ավել ի՞նչ լինի»,- ասաց նա՝ միևնույն ժամանակ նշելով, որ դեմ չէ «Սասնա ծռեր»-ի անդամների նկատմամբ համաներում կիրառելուն: Հաջորդ տուժողը Լյուդվիգ Չալաբյանն էր, որը 2016թ․հուլիսի 17-ին բժիշկ Հովհաննես Հովհաննիսյանի և բժշկուհի Անահիտ Ենգիբարյանի հետ մտել է ՊՊԾ գունդ՝ բժշկական օգնություն ցուցաբերելու նպատակով: Նա ՊՊԾ գունդ մտած շտապ օգնության վարորդն է: Լ. Չալաբյանը հայտարարեց, իրեն գործով տուժող չի ճանաչում և «Սասնա ծռեր»-ի անդամների համաներմանը չի առարկում: