Մանվել Գրիգորյանը լրատվամիջոցից պահանջում է 3 մլն դրամ. նոր հայցադիմում է ներկայացվել

ԱԺ նախկին պատգամավոր, ԵԿՄ նախկին նախագահ, ներկայումս մեղադրյալ Մանվել Գրիգորյանը հայցադիմում է ներկայացրել ընդդեմ Maxinfo.am լրատվական կայքի: «Փաստինֆո»-ի փոխանցմամբ` Մ.Գրիգորյանը կայքից պահանջում է 3 մլն դրամ որպես  պատվին և արժանապատվությանը պատճառված վնասի հատուցում: Հայցադիմումը դատարան է մուտք եղել փետրվարի 19-ին, որը մակագրվել է դատավոր Արթուր Ստեփանյանին: Նշենք, որ սա երկրորդ հայցադիմումն է ընդդեմ նշված կայքի: Առաջինը ներկայացվել է հունվարի15-ին, որը Երեւանի ընդհանուր իրավասության դատարանի հունվարի 25-ի որոշմամբ հետ էր վերադարձվել: Հայցվորի ներկայացուցիչ Կարեն Ղոնյանն ավելի վաղ հայտնել էր,  հայցադիմում ներկայացնելու պատճառը «Մաքսինֆո» կայքում հրապարակված՝ «Առեւտուր թուրքերի հետ․ Մանվել Գրիգորյանի մասին եւս մեկ աղմկահարույց բացահայտում» վերտառությամբ նյութ ն է, որում նշված է եղել, թե Մանվել Գրիգորյանը ժամանակին թուրքերին է վաճառել Վազգեն Սարգսյանի կողմից իրեն հանձված 1500 գլուխ ոչխար: Ավելի վաղ Մանվել Գրիգորյանը հայցադիմում էր ներկայացրել նաեւ  ընդդեմ Սիլվա Համբարձումյանի, որով պահանջել է հատուցել  իր պատվին եւ արժանապատվությանը պատճառած վնասի համար։ Հայցադիմումը մակագրվել էր դատավոր Գայանե Խաչատրյանին, ով փետրվարի 7-ին ինքնաբացարկ է հայտել: Գործը փետրվարի 14-ին մակագրվել է դատավոր  Նաիրա Ավետիսյանին: Հիշեցնենք, որ Սիլվա Համբարձումյանը «Հրապարակի» հետ զրույցում հայտարարել էր, որ փաստեր կարող է ներկայացնել, որոնք կապացուցեն, որ Մանվել Գրիգորյանը «երեխեքի է բռնաբարել»: Մանվել Գրիգորյանը պահանջում է հերքել այս հայտարարությունը եւ դրամական փոխհատուցման պահանջ չի ներկայացրել: