Ով է մանուկ ժամանակ ճնշել Արայիկ Հարությունյանին
Կրթության եւ գիտության նախարար Արայիկ Հարությունյանի մասին ոլորտում արդեն ուրույն կարծիք է ձեւավորվել: Մասնավորապես, դպրոցական կոլեկտիվներում այլեւս կասկած չունեն, որ նախարարը ծանր դպրոցական տարիներ է ունեցել եւ նրան ամենօրյա ռեժիմով ճնշել են նրա ուսուցիչները: Ինքն էլ մեծացել է ու որոշել է մուռը հանել նրանցից: Ամեն Աստծո առավոտ ԿԳ նախարարն արթնանում է եւ իր նոր որոշմամբ սթրեսի ենթարկում ուսուցչական կոլեկտիվներին: Օրինակ մի օր արթնանում է ու որոշում, որ դպրոցներում, կամ որոշ դպրոցներում պետք է լուծարեն մանկավարժական խորհուրդները ու նորը ձեւավորվեն, թե ինչու, դա արդեն կարեւոր չէ, կարեւորը, որ նախարարն է այդպես ցանկանում: Մի օր էլ հրովարտակ է արձակում նոր ծնողական կոմիտեներ ձեւավորել: Ավելորդ է խոսել, որ վերջին շաբաթներին նախարարը հրահանգել է հակահեղափոխական տնօրեններ ունեցող դպրոցներում ստուգումներ անցկացնել, դրանց արդյունքում որպես կանոն տնօրենները հրաժեշտ են տալիս պաշտոններին : Ուշագրավ է, որ դպրոցների կոլեկտիվներին ամենօրյա փորձության ենթարկելուն զուգահեռ նրանց նկատմամբ ֆինանսական սանկցիաներ են կիրառվում: Մի քանի դպրոցներից տեղեկացանք, որ ուսուցիչները 13-րդ աշխատավարձ չեն ստացել, նրանց պարգեւատրումը եղել է աշխատավարձների 40 տոկոսի չափով: Իսկ փետրվարի աշխատավարձները մոտ 7-10 օրով ուշացրել են: Բայց սա դեռ ամենը չէ: Կրթության եւ գիտության նախարարի արկածները սրանով չեն սահմանափակվում: Մեզ պատմեցին, որ նախարարի հրահանգով ենթականերին խիստ զգուշացում է տրվել, որ հանկարծ Տյառն ընդառաջի տոնակատարության նկարներ չհրապարակեն դպրոցների պաշտոնական ՖԲ էջերում, առավել եւս կայքերում: Ինչպես հայտնի է, այս տոնը ամեն տարին նշվել է նաեւ դպրոցներում: Բայց քանի որ իշխանությունների՝ հայ առաքելական եկեղեցու նկատմամբ հարաբերությունները բոլորին է հայտնի, ապա հասկանալի է,թե ինչով է պայմանավորված նման վերաբերմունքը: Հիշենք, որ ամիսներ առաջ քննարկվում էր դպրոցներից եկեղեցու պատմության դասաժամերը կրճատելու, ապաեւ հանելու հարցը, որը մեծ աղմուկ բարձրացրեց ու թերեւս այդ պատճառով դուրս եկավ օրակարգից: Հատկապես Արայիկ Հարությունյանի եւ Կյանքի խոսք կրոնական կազմակերպության հետեւորդների միջեւ հետաքրքրական փոխհարաբերություններ կան: Շատերն են նկատել, որ նրա ֆեյսբուքյան գրառումներին այս կազմակերպության հետեւորդներն առանձնակի ակտիվությամբ են արձագանքում, եթե այդ գրառումը առաքելական եկեղեցու մասին է: Ի դեպ, տեղեկություններ կային, որ ընտրություններին էլ Կյանքի խոսքի հետեւորդները ակտիվ աջակցել են Փաշինյանին ու իր թիմին, գուցե դրանով է պայմանավորված, որ անգամ դպրոցներում չի խրախուսվում ծիսական տոնակատարությունները: Անի Սահակյան